e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Ruinaulta
Chavorgia dal Rain Anteriur tr. Castrisch e La Punt/Rehanau, cun ina lunghezza da var 15 km. Enturn il 1880 ha il geolog Albert Heim rendì attent per l'emprima giada a quella chavorgia naschida da la pli gronda bova preistorica da l'Europa. Fin oz n'han ins betg pudì refutar sia ipotesa, tenor la quala l'entira massa da terra da 12-15 mia. m3 (15 km³) saja ida a val en ina giada. Tenor ina dataziun novissima da Clemens Augenstein è la R. sa furmada enturn l'onn 8000 a.C. Il Rain n'ha anc betg cuntanschì il fund da la bova. Il material consista d'in smugl da chaltschina dal Giura (epoca geologica) e da spelms erratics (p.ex. granit da Punteglias). La bova aveva stagnà in lai che s'extendeva da Castrisch fin tranter Tavanasa e Trun. Il Rain ha alura transportà il material da terra e crappa da la val oragiu. Las cascadas èn sparidas, restadas èn percunter las serpentinas impressiunantas, sco la "Chrummwag" sut la staziun da la Viafier retica da Versomi. Tras e sur la bova maina la via chant. da Panaduz a Valendau ed a Glion. Dapi il 1903 maina era la lingia da la VR Rehanau-Mustér tras la chavorgia. La R. è registrada en l'Inventari fed. da las cuntradas e dals monuments natirals d'impurtanza naziunala. Il project per ina via directa tras la R. en Surselva è vegnì suspendì.
Litteratura:
Radioscola, 4/1959, 1. cudischet, [7-13]; C. Augenstein, Spuren des Flimser Bergsturzes im Dachlisee (Obersaxen), en: JNGG, 114/2007, 43-57.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| | |
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Rufer, Alfred