Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Carl, Hans (von Hohenbalken)Carl, Kaspar (von Hohenbalken) lemma sequent

Carl il Grond
* prob. ils 2-4-747, † 28-1-814, □ en la chaplutta palatina ad Aachen. Figl il pli vegl dal retg Pippin III e da Bertrada. Retg dals Francs a partir dal 768 e sulet regent suprem suenter la mort da ses frar pli giuven Karlmann (771). Il di da Nadal da l'onn 800 è C. vegnì encurunà a Roma tras il papa Leo III ed è daventà qua tras l'emprim imperatur medieval da l'Occident.
Parallel a l'extensiun da l'Imperi francon, ha C. realisà refurmas internas, o.t. tras l'annexiun da regiuns lontanas dal domini francon, p.ex. da la Currezia, nua ch'el ha introducì la constituziun dal contadi francon (806). La curt imperiala da C. ha inizià refurmas culturalas determinantas per il svilup da la scrittira (minuscla carolingica) e da l'art (renaschientscha carolingica), spez. en las claustras da S. Gagl e da Reichenau (insla en il Lai da Constanza). C. ha però gì paucs contacts cun la Svizra odierna: las unicas attestaziuns da relaziuns directas èn in segiurn a Genevra (773), la traversada dal Grond S. Bernard (801), in doc. per Cuira (772/74) e trais per S. Gagl (in dal 772, dus dal 780) ed eventualmain la famusa chanta d'aur da Saint-Maurice. En terra helvetica ha il "bap da l'Europa" giudì gronda stima: a S. Gagl p.ex. vegniva el considerà sco "il meglier da tut ils imperaturs", entant che Notker il Balbegiader, autur da las «Gesta Karoli Magni Imperatoris», publitgadas sin iniziativa dal sutbiadi da C., Carl il Gross, ha furnì il purtret d'in monarc cristian gia fermamain idealisà. Ina ritga tradiziun carolingica è sa sviluppada a moda particulara a Turitg: la canonisaziun da C. il 1165 ed il transferiment da las reliquias a Turitg il 1233 han consolidà ses renum sco fundatur presumtiv dal Grossmünster. A C. vegn era attribuida la fundaziun da la claustra da Müstair; la statua dal 12. tsch. (?), exponida en la baselgia claustrala, e las indicaziuns cuntegnidas en ils cartularis e chalendaris dal temp medieval tardiv cumprovan la veneraziun enragischada da C. dapi il 16. tschientaner.


Litteratura:
Karl der Grosse, 5 ts, edì da W. Braunfels, 1965-68; R. Kaiser, Churrätien im frühen Mittelalter, 1998 (2008²); H.R. Sennhauser, Kloster Müstair, Gründungszeit und Karlstradition, en: König, Kirche, Adel, edì da R. Loose, S. Lorenz, 1999, 125-50.

Reinhold Kaiser

lemma precedents Carl, Hans (von Hohenbalken)Carl, Kaspar (von Hohenbalken) lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :