Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents BreschaBrev dals trais sigils lemma sequent

Brev da federaziun
Suenter la Guerra svabaisa dal 1499 è il domini aristocratic-feudal entrà en sia fasa da dissoluziun finala, e suenter il 1520 è la Refurmaziun sa derasada spert era en il Grischun. A chaschun da la Dieta salvada il 1524 a Glion han ils cumins da la LG, da la LCD e da la LDD ed ils signurs feudals contractà per l'emprima giada sco partenaris cun dretgs eguals. La federaziun dals 23-9-1524 n'è betg il resultat d'ina fundaziun da stadi uffiziala - las instituziuns statalas eran gia sa consolidadas e vegnan tractadas mo a l'ur (art. 18-22) -, mabain ina resposta collectiva da las Lias a la pressiun pli e pli ferma da vart da l'exteriur; ella mussa sco tala grondas parallelas cun las numerusas allianzas da pasch publica da la Confed. (Rütli e.a.). Ils artitgels principals tractan la segirtad e defineschan l'instrumentari per stabilir e garantir quella a ses commembers, v.d. l'obligaziun al succurs en cas da guerra (art. 3-7) ed il proceder legal en cas da cuntraversas (art. 8-17, 23-27). I n'exista betg in sulet "original" da questa brev, mabain trais variantas cun pitschnas differenzas; ils detagls da sia genesa èn nunenconuschents. Sigillada è ella cun ils sigils da la LG, da l'avat da Mustér e dal signur da Razén sco era cun quels da Cuira (per la LCD) e da la LDD. Betg sigillà han l'uvestg da Cuira (sco signur dal contadi da Sax-Mesauc/LG) ed ils Habsburgais (sco landfocts en las Otg Dretgiras/LDD), lur dretgs legitims èn dentant vegnids confermads explicitamain.


Litteratura:
HbBG 2 e 4; IG, 108 s.

Adolf Collenberg

lemma precedents BreschaBrev dals trais sigils lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: