Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Trepp, MartinTrilinguitad grischuna lemma sequent

Triest
Citad da port tal., situada al nord da la Mar Adriatica. Port sut suveranitad austr. dapi il 1382, port liber a partir dal 1719 e stadi liber dal 1947-52, tal. Trieste. L'emprim Grischun attestà a T. è Jousch Duri da Samedan (*1683). Suenter l'expulsiun dals Grischuns da Vaniescha il 1766, è la plipart dals Ladins bandischads sa domiciliada a T. La toleranza demussada da l'imp. Joseph II envers ils refurmads (admissiun da confessiuns betg cat. il 1781) ed il domini franz. (1797-1814) han pussibilità a la colonia grischuna a T. da sa sviluppar. Dapi il 1782 exista ina Società Elvetica di Beneficenza da refurmads a T. che furma de facto in'uniun dad Engiadinais. Il 1785 ha quella communitad cumprà la baselgia da S. Silvester (la pli veglia da T., oz in monument naz.). Da gronda impurtanza è stada a partir dal 1794 la chasa commerziala dad Andrea Griot da Schlarigna, consul svizzer a partir dal 1802. Il 1837 han ils Puschlavins Giuseppe Narcissus Pozzi, Pietro Antonio e Francesco Tosio fundà (ens. cun Giacomo Wegmann) la firma da commerzi en gros Tosio & Co. Ils Grischuns eran engaschads fermamain en il commerzi ed en la producziun da textilias (ils Ganzonis, Cloettas e.a.). Da las 37 cafetarias registradas a T. appartegnevan il 1815 21 a Grischuns (Danz, Gilli, Pitschen, Casparis e.a.). Anc oz è derasada a T. la moda da dir: "Dio ci guardi dai lampi e dai tuoni e dai cazotti dei Grigioni" ("Dieu ans preservia dals chametgs e dals tuns e da las fridas dals Grischuns"). Il cudesch da baselgia da la communitad evang. a T. inditgescha tr. il 1783 ed il 1865 373 mortoris da Grischuns a T., cun paucas excepziuns Engiadinais e Bregagliots. Da quels èn ca. 35% morts avant lur 20. onn da la vita, e mo 20% han cuntanschì ils 50. Mo paucas interpresas han survivì l'Emprima Guerra mundiala; existent anc a l'entsch. dal 21. tsch. è il Caffè Stella Polare, fundà il 1765 da Gion Darms da Flond.


Litteratura:
D. Kaiser, T. – süls stizis da la pü granda colonia grischuna a l’ester, en: Annalas, 109/1996, 99-112; S. Sigerist, Bündner Familien in T., en: JHGG, 2005, 5-25; L. Candreia, "Bon di Trieste", en: LQ, 20 e 26-4-2007; A. Färber, Noch auf Schildern präsent, en: TG, 2007, nr 5, 66-69.

Adolf Collenberg

lemma precedents Trepp, MartinTrilinguitad grischuna lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: