Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Medeghin, IlMedel/Valragn lemma sequent

Medel/Lucmagn
Vischnanca polit., cirq. Mustér, distr. Surselva (avant il 2001 Rain Anteriur), situada en l'intschess dal Rain da Medel. Il territori com. correspunda a quel da la Val Medel d'ina lunghezza da 16 km che collia la Surselva cun il Tessin e cumpiglia set fracziuns sparpagliadas ad in'autezza da 1332 fin 1621 m sur mar: Curaglia (vitg central), Soliva, Mutschnengia, Platta (lieu da patrunadi, santeri da la val), Drual/Matergia, Pardé, Fuorns, S. Gions. Ina tschuncantina d'anteriurs bains ed abitadis da stad (tr.a. Pali, Biscuolm, Casura) n'èn betg pli abitads. 1315 de valle Mederis, tud. Medels im Oberland (uffiz. fin il 1943). 1850 609 abit.; 1900 536; 1950 614; 1960 835; 2000 470. Davent da Mustér è vegnida colonisada en il temp medieval tempriv la part externa da la val, en il 12. e 13. tsch. la part centrala, ed en il temp medieval tardiv è vegnì avert l'intschess dal Lucmagn era nà da la Val dal Blegn. Ils Gualsers han participà mo a l'ur a quest process, p.ex. a Mutschnengia. A la fin dal 14. tsch. devi var 60 abitadis a M. che steva sut il domini territorial da la claustra da Mustér. Il 1355 ha la glieud da la Cadi dentant obtegnì in agen mastral ed il 1526 resp. il 1643 la suveranitad giudiziala. Il 1744 ha la vischnanca da M. cumprà ora las dieschmas claustralas. La baselgia da vallada a Platta (menz. il 1338), consecrada a s. Martin, era affiliada a la plaiv da S. Gions a Mustér. Il 1454 è ella daventada autonoma, il 1500 in'atgna plaiv. Il 1642 è vegnida erigida a Curaglia la chaplania da curazia, deditgada a s. Clau. L'abazia da Mustér administrava ospizis a S. Gagl (menz. il 1261), a S. Gions ed a S. Maria (menz. il 1374). Il pli tard a partir dal 1366 fin viaden il 17. tsch. ha ella explotà argent a M. Il vitg è vegnì collià cun la rait da vias il 1780; la nova via dal Lucmagn è vegnida averta il 1875 e la via chant. construida en ils onns 1956-63. Dapi il 1929 viva M. da tschains d'aua considerabels (tr.a. dal lai da serra da S. Maria). Il dumber dals bains purils è sa diminuì fermamain en la vischnanca tradiziunalmain purila, entant ch'il turissem d'enviern ed il traffic sur il pass èn s'augmentads. La meglieraziun generala è succedida il 1981-2001. Scolas primaras existan a Curaglia ed a Platta, ils scolars secundars penduleschan dapi il 1973, ils scolars reals dapi il 1980 a Mustér. Il 2005 lavuravan anc 55% da las persunas cun activitad da gudogn a M. en il sectur primar. Part da la populaziun da lingua rum.: 2000 92,8%/96,0% (ML/Lindic). Dapi il 2000 cumparan ils «Piogns», ina revista da M.


Litteratura:
Bundi, Besiedlung, 349-55; C. Pally e.a., Val Medel, 1996; U. Frey, Kulturlandschaft Val Medel, en: BM, 2003, 243-73.

Adolf Collenberg

lemma precedents Medeghin, IlMedel/Valragn lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :