Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents BergiagliaBerna lemma sequent

Bergiaglia, Val
Cirquit dal distr. da Malögia e vallada che s'extenda sur 32 km da Malögia vers il sidvest a Clavenna, cun ina pendenza da 1500 m e cun in clima autalpin en la part sura ed ina vegetaziun meridiunala al sid da Castelmur, tud. Bergell, tal. Bregaglia. Da la B. mainan las rutas dals pass dal Set e dal Güglia vers il nord ch'èn prob. las vias da transit las pli veglias e las pli impurtantas sur las Alps Centralas. Auters pass mainan da la B. en la Val d'Avras (Duana, Bergalga) ed en Vuclina (Müret). Il flum Maira percurra la B. ed avra la val geograficamain e culturalmain vers il sid. Ma la B. è adina era s'orientada vers il nord. Ella appartegna al Grischun tal. (2000 75% l.p.) ed è la suletta vallada taliana ref. dal Grischun (2000 70% ref.). Il cunfin politic cun il cirquit d'Engiadin'Ota passa tras il Lej da Segl da l'autra vart dal sparta-auas. Il flum Lovero a Castasegna furma il cunfin svizzer cun l'Italia. Il center da la B. è dapi tuts temps Visavraun.     
Sin il Crep da Caslac sur Visavraun sa chattava ina culegna dals temps preistoric e protoistoric ed ina tur da guardia dal temp rom. tardiv. Pitschens altars da Mercur al Crep da Caslac ed a la staziun rom. Murus a Castelmur, munaidas, fragments da vias, la rampa dal Malögin e numerus chats pli pitschens dateschan dal temp roman. La B., attestada l'onn 46 s.C. sco Bergale, era gia en il 2. ed 1. tsch. a.C. sut il domini roman. Ella era incorporada a l'entschatta en la prefectura da Com, suenter l'onn 350 en la prov. Raetia prima. En il 4. tsch. è la B. vegnida cristianisada tras Gaudentius († 348) ch'ha chattà qua protecziun dals Arians. La baselgia sur Casaccia, demolida il 1551, è deditgada a s. Gaudenzio. L'onn 488 è la B. vegnida suttamessa al domini ostrogotic, il 568 a quel dals Lumbards; l'onn 803 è ella vegnida integrada en il contadi da Com. Durant la partiziun da l'Imperi carolingic (ca. 840) ha la B. furmà il ministeri curretic da la Bregallia; il Lovero cunfinava la Currezia vers il sid. L'onn 960 ha l'imp. Otto I regalà la B. a l'uvestg da Cuira che controllava qua tras las rutas dal Set e dal Güglia. En il temp autmedieval ha la B. furmà ina vischnanca da vallada cun vasts dretgs da libertad. La cultivaziun dal terren era gia fermamain progredida il 1100. Il transport da martganzia e la vendita da chastognas èn stads da tuts temps da gronda impurtanza economica per la B. Il declin dals transports, provocà tras l'avertura da la via dal Gottard, ha necessità en il temp medieval tardiv in'orientaziun vers l'agricultura, cun l'explotaziun da la planira auta da Malögia e da las pastgiras alpinas da las vals dad Avras e da Madris.
En il temp medieval tardiv possedevan las fam. ministerialas dals Salis, Plantas, Prevosts, Castelmurs e Stampas sco era l'uvestg da Cuira la plipart dal terren en B. Castelmur furmava ina fortezza cunter Com ch'aveva occupà Sottoporta il 1219. Il 1367 è la B. vegnida incorporada sco dretgira auta en la LCD. L'uvestg da Cuira incassava anc adina il dazi e la taglia militara ed elegeva il podestat d'ina proposta da trais. Il 1387 ha el laschà construir ina via da salaschada da Tinizong sur il Set a Plür. Il 1474 ha Sottoporta obtegnì in'atgna dretgira per cas da bagatella, il 1489 ina dretgira civila limitada. En il temp medieval tardiv èn sa furmadas a Sopraporta las quatter "squadras" da S. Cassian, Piazza/Visavraun, Coltura e Borgonovo sco era la "settima" parzialmain autonoma da Casaccia, a Sottoporta ils "terziers" da Castasegna, Suogl e Buond. A partir dal 1496 vegniva il podestat nominà da mintgamai otg electurs e d'in notar uffizial da Sotto- e da Sopraporta. Suenter la fundaziun da la Republica da las Trais Lias il 1524 e la liberaziun da la B. dals dretgs feudals episcopals il 1526, è vegnì stabilì in nov urden giudizial (1535): la dretgira criminala per l'entira val e quella civila per Sopraporta sa radunavan a Visavraun, la dretgira civila per Sottoporta a Suogl. Cun la refurmaziun, introducida en la B. enturn il 1550, ha l'uvestg da Cuira pers ses dretgs ecclesiastics en la B. Ni ils dominicans e gesuits, protegids dals Salis, ni ils chaputschins en Vuclina (1622), sustegnids da truppas dal papa, n'èn reussids da recatolisar la val. La determinaziun dal tal. sco lingua uffiziala en B. (1546) ha favurisà l'independenza politica da la val. La populaziun ha stuì subir, o.t. durant ils Scumbigls grischuns, grondas tribulaziuns (devastaziuns tras las truppas spagn. il 1621, e.a.). Cun la perdita da la Vuclina il 1797 è la B. daventada era economicamain ina regiun periferica dal Grischun, il tal. è regredì ad ina lingua minoritara. Suenter la construcziun da la via dal Malögia il 1827-28 ed il 1834-40 ha la B. renunzià al Pass dal Set. Ils projects d'ina via da Clavenna a Danuder (1771-74) e d'ina viafier da S. Murezzan a Clavenna (1910) n'èn betg vegnids realisads.
Il dialect da la B., il bregagliot, cuntegna numerus elements dal rum. e dal lumbard. Las ovras litteraras las pli impurtantas scrittas da Bregagliots èn la «Stria» (1875) da Giovanni Andrea Maurizio e las translaziuns dal «Wilhelm Tell» (tenor Friedrich Schiller) e dal «Jürg Jenatsch» (tenor Conrad Ferdinand Meyer) da Giacomo Maurizio. La fam. dals artists Giacometti da Stampa han cuntanschì renum mundial. Il 1851 è l'anteriura dretgira auta da la B. daventada in cirquit dal district da Malögia. La B. è sa depopulada fermamain en ils davos 150 onns: 1803 2'170 abit.; 1990 1'434; 2000 1'503. L'agricultura, antruras predominanta en la B., ha pers sia impurtanza. L'explotaziun da l'energia idraulica ed il turissem han creà novas plazzas da lavur e garantì novas entradas a la val.


Litteratura:
Planta, Verkehrswege 2, 13-93; A. Hegland e.a., Altertumsforschung und angebliche Römerstrassen, en: JHGG, 1992, 211-29; R. Stampa, R. Maurizio, Das Bergell - La Bregaglia, edì dad A. Schneider, cun ill. da H. Schlaepfer-Stampa, 19944; S. Bianconi, Plurilinguismo in Val Bregaglia, 1998; R. Togni, Bregaglia, 2002; Simmen, Wappen, 179, 185, 294-96.

Adolf Collenberg

lemma precedents BergiagliaBerna lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :