Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents ValplaunaValragn lemma sequent

Valragn
Vallada sin il stgalim suprem da la Val dal Rain Posteriur, cun la chadaina dal Pez V. (3402 m) sco term che s'extenda sin 25 km vers ost tras las Alps grischunas occidentalas. Populada prevalentamain da glieud da lingua tud. (2000 93%) Al nord vegn la val cunfinada da las Splügner Kalkberge e dal Bären- e Chilchalphorn, al sid da la gruppa da muntognas Tambo-Curciusa e da la chadaina dal Surettahorn. Vers il nord mainan il Calandari (tud. Safierberg) ed il Cuolm Val, vers il sid il Pass dal Spleia (numnà pli baud Urschler) ed il San Bernardin (numnà pli baud Vogelberg resp. Monte Ucello). Las tschintg vischnancas da Sur, Spleia, Medel, Novagnas e V. furman abitadis serrads e sa chattan en il funs da la val da la vart sanestra dal Rain Posteriur. Sco barriera orografica ha pussibilità la Puntcrap il svilup d'ina cuntrada vasta e particulara. 1273 valle Reni, 1338 Rinwald, tud. Rheinwald. 1781 1'143 abit.; 1850 1'274; 1900 899; 1950 822; 2000 758.

Chats dal temp da bronz e da fier lung las veglias sendas da sauma sur ils pass da Spleia e dal S. Bernardin. Rumantschs han colonisà Sur e Spleia gia en il temp autmedieval davent da la Val Schons, entant che la part interna da la val vegniva utilisada mo sco territori d'alp e da pastgira. Enturn il 1265 èn immigrads colonists gualsers da la Val Formazza, da Simpeln (Simplon), Brig e da la Val Maggia sur il S. Bernardin en il V. La domiciliaziun da glieud da lingua tud. è succedida sin iniziativa dals de Sax-Mesauc che possedevan dretgs territorials en il V. Dadens. La part externa da la val era en possess dals baruns de Vaz ch'han prendì l'entira val sut lur protecziun vers la fin dal 13. tschientaner. Il 1337, suenter la mort dal davos represchentant dals de Vaz, è il V. passà sco dota als conts de Werdenberg-Sargans ch'han vendì el il 1493 a la fam. da conts milanaisa Trivulzio. Gia il 1400 appartegneva il V. (che sigillescha il 1362 sco Comunis vallis Reni) a la Lia Sura u LG. Pir il 1616 è la relaziun da protecziun cun ils Trivulzios vegnida schliada, ed a partir dal 1636, suenter la liberaziun dals tschains funsils e dals dazis, ha furmà la val in cumin autonom, integrà en la dretgira auta da Schons entaifer la LG. Ecclesiasticamain ha appartegnì la val interna cun la pravenda da S. Pieder (V., Novagnas, Medel) oriundamain al chapitel da S. Vittore en il Mesauc, entant che la val externa (Spleia, Sur) faschevan part da la plaiv gronda da S. Martin/Ziràn. Pauc temp suenter la disputaziun religiusa da Glion dal 1526 èn las tschintg vischnancas dal V. sa separadas definitivamain ed èn daventadas autonomas. La refurmaziun ha prob. introducì Leonhard Seiler enturn il 1530. Cun excepziun da la baselgia da V. èn tut las baselgias odiernas vegnidas erigidas en la segunda mesadad dal 17. tschientaner. A partir dal 15. tsch. ha furmà il transport da rauba sur il Spleia ed il S. Bernardin, garantì dal port local, sper in'agricultura modesta la funtauna da gudogn principala da la populaziun. Il port, dividì il 1605 en in port dadens ed in port dadora, ha existì fin il 1861. Il traffic da transit ha cumenzà a flurir vers il 1650 ed ha existì fin a la construcziun da las viafiers alpinas en il terz quart dal 19. tschientaner. Il 1856 han ins transportà 27'100 t martganzia sur il Spleia, il 1883 mo anc radund 1'000 t. Il 1799-1800 han truppas austr. ed o.t. franz. occupà e sblundregià la val. Dal 1818-23 èn vegnidas transfurmadas las sendas da sauma sur il Spleia ed il S. Bernardin en vias commerzialas charrablas, quai ch'ha chaschunà in augment dal traffic da viadi. Tr. il 1940 ed il 1944 han cumbattì ils da V. cun success ils plans da las OE V. per in lai da serra ch'avess inundà quasi l'entira val. L'avertura d'in tschancun da la A13 (1967) e dal tunnel da via tras il S. Bernardin, frequentà en ils emprims 25 onns da bunamain 40 miu. vehichels, ha chaschunà o.t. per il lieu principal Spleia in augment dal turissem (d'enviern).
Il district da V. (cun il lieu principal Andeer) ha consistì dapi il 1851 dals cirquits da Schons, Avras e V. El correspundeva al Rain Posteriur, sisavel district dal chantun Rezia entaifer la Republica helvetica, stgaffì il 1801. Tras votaziun dals 13-3-2000 è il district da V. vegnì transfurmà en il district dal Rain Posteriur, al qual appartegnan dapi il 2001 era ils cirquits da la Tumleastga e da Tusaun (senza Stussavgia).


Litteratura:
W. Oswald, Wirtschaft und Siedlung im Rheinwald, 1931; P. Issler, Die Geschichte der Walserkolonie Rheinwald, 1935; P. Liver, Rechtsgeschichte der Landschaft Rheinwald, 1936; Kdm GR 5, 251-75; K. Wanner, Region Rheinwald-Avers, 1990.

Kurt Wanner

lemma precedents ValplaunaValragn lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: