Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Bezzola, AndreaBezzola, Domenic lemma sequent

Bezzola, Clo Duri
* 14-7-1945 a Scuol, † 17-8-2004 a Männedorf/ZH, ref., da Zernez. Figl da Gian Duri, electricist, e dad Elsa Julia n. Lareida. ∞ 1971 Gertrud n. Müller, da la Germania. Seminari scolastic a Cuira, alura mag. primar a Segl. Studi da mag. secundar a Turitg, mag. secundar a S. Murezzan (1972-75) ed ad Oetwil am See/ZH (1975-2002), alura scriptur liber a Männedorf. Autur da lirica («Our per la romma», 1978; «Il blau engulà/Das gestohlene Blau», 1998), prosa («A l'ur dal di», 1984; «Zwischenzeit», 1996) e dramatica en rum. e tud. Translatur e reschissur da teater. Autur da gieus auditivs e d'istorgias da paraid, editur d'in cudesch illustrà scrit dad uffants per uffants («Kindels dal malom», 1977) e d'in cudesch da scleriment sexual («Tü ed eu da pè a cheu», 1972). Scriptur engaschà, marcà dal moviment dals onns 1968. Collavuratur da la revista satirica lad. «Il Chardun». Promotur ed ambassadur da la litteratura rum. (pres. da l'USR 1987-91), suprastant da l'Uniun svizra da scripturs e scripturas 1990-96 (vicepres. 1993-96). Confundatur e redactur da la revista «Litteratura» e confundatur dals Dis da litteratura a Domat. Comm. dal cussegl da fundaziun da la Pro Helvetia 1992-98. Premi da la Fundaziun Schiller 1979, da la CRR 1992, premis da renconuschientscha dals chantuns Grischun 1996 e Turitg 1998. Segiurn litterar a Londra 2000. B. ha dà ina nova vusch a la lirica rum. ed ha tractà temas novs, impurtants per sia generaziun. Sias ovras expriman sia perplexitad persunala visavi il svilup social e politic dal temp e sia solidaritad cun ils debels e marginals en in mund globalisà.


Litteratura:
Bezzola, Litteratura, 517, ann. 195 e 753, ann. 184; Deplazes, Funtaunas 4; C. Riatsch, Mehrsprachigkeit und Sprachmischung in der neueren bündnerromanischen Literatur, 1998; Scriver è viver - Clo Duri B. ed il cancer [film da RTR], reschia: P. Kreiliger, 2004; Chal. ladin, 2005, 145 s.; LTS, 192; BJb, 2006, 147-50.

Clà Riatsch

lemma precedents Bezzola, AndreaBezzola, Domenic lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :