Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Vinzens, UrsinaViscardi lemma sequent

Visavraun
Anteriura vischnanca polit., cirq. Bergiaglia, distr. Malögia. Fusiunada il 2010 a la vischnanca polit. da Bergiaglia. La pli gronda anteriura vischnanca da la Bergiaglia che consistiva da V. (1067 m) e da las fracziuns da Roticcio e Pongello. Il 1971 è vegnida incorporada l'anteriura vischnanca da Casaccia a quella da V. 1096 Vicus Supranus, tal. Vicosoprano (uffiz.). 1850 383 abit.; 1900 417; 1950 415; 1960 568 (constr. dal mir da serra Albigna); 1970 387; 2000 429. Sur Bosca han ins chattà in crap-scalutta e sper Caslac, sur la baselgia da S. Cassian, in pitschen altar rom., deditgà a Mercur, da la segunda mesadad dal 4. tschientaner. Fin il 960 han appartegnì ils abitants da V. a la Chadè da Com, alura a l'uvestgieu da Cuira. Sco lieu principal dal cumin da la Bergiaglia furmava V. in center dals transports ed era la sedia dals ports en Bergiaglia e da las fam. da ministerials Castelmur e Prevost. L'uvestgieu da Cuira possedeva ina furtga (dretgira criminala) a V. Ses chastellan tegneva dretgira en l'uschen. Tur da Senwelen, la suletta tur radunda medievala mantegnida dal Grischun. Questa tur, menz. per l'emprima giada il 1314, deriva dal 13. tsch. e serviva sco staziun da duana a l'uvestgieu. Il 1591-92 è ella vegnida integrada en la nova chasa-cumin munida d'ina praschun, d'ina chombra da tortura e d'in pal da vargugna. Las localitads inferiuras da la chasa-cumin vegnivan duvradas sco magasin per rauba da duana  che alloscheschan actualmain in museum. La tur quadra da Salis, construida il 1537, è l'ensaina da V. Fin a la refurmaziun (1529 resp. 1553) ha appartegnì V. ecclesiasticamain, sco part dal'archiplaiv Bergiaglia, a S. Maria sin la Porta. La baselgia da S. Cassian, situada al nord da V., è cuntanschibla sur ina punt artgada dal 16. tschientaner. Quella vegn menz. per l'emprima giada il 1355, ella è dentant pli veglia. La nova baselgia ref. da la S. Trinitad è vegnida erigida il 1761 da la vischnanca cumplessiva da Sopraporta. Il 1901 è vegnida construida la baselgia catolica. Entant che l'agricultura gioga ina rolla subordinada, predomineschan a V. il mastergn ed il turissem (pendiculara Pranzaira-Albigna, runal da skis a Casaccia). La vischnanca profita dals fits d'aua e da las taglias da las OE Bergiaglia (mir da serra Albigna cun centrala e batschigl da cumpensaziun a Löbbia). Il 1960 è vegnida construida ina via da sviament. Dapi il 1972 sa chatta la scola secundara da la val a V.


Litteratura:
Kdm GR 5, 456-73; R. Stampa, Storia della Bregaglia, 1963 (1991³); Gem. GR, nr 204, 1983; Gem. GR, 2003, 418 s.

Adolf Collenberg

lemma precedents Vinzens, UrsinaViscardi lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :