Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents TrinTrin, Fuorcla lemma sequent

Trin
Vischnanca polit., cirq. T., distr. Il Plaun, situada a la via principala tr. Tumein e Flem, cun las fracz. da T. Digg e Trin Mulin. T. vegn attribuì a la Surselva, sa chatta geograficamain dentant "sut la Selva" (da Flem). 12. tsch. Turunnio, tud. Trins (fin il 1943). 1803 686 abit.; 1850 919; 1900 755; 1960 663; 2000 1'108. Scuverta da craps-scalutta dal temp preist. a Tignuppa a l'ost da Canaschal e dal Crap Tignus dal medem temp al nordvest dal vitg da T.; fragments da recipients dal temp da bronz e dal temp rom. sin il Crap Sogn Barcazi; fibla da Certosa cun rudella sin l'Alp Mora. Per l'epoca suenter il temp medieval tempriv è attestada ina cultivaziun intensiva cun ina seria da culegnas exteriuras (tr.a. Pintrun, abità anc a l'entsch. dal 21. tsch.). En il temp medieval tempriv ed en il temp autmedieval manava la via en Surselva sur T. Digg, Pintrun, Conn e Tuora a Sagogn e Glion. Durant il temp medieval tempriv han existì prob. bains roials a T. Digg. Il chastè da Canaschal, ina fortezza prestanta dal Crap S. Barcazi situada a l'ost da la baselgia, è vegnì bandunà en il 15. tschientaner. Il 1616 è la vischnanca sa cumprada libra dal signuradi da Crap S. Barcazi. A la plaiv da T. ha appartegnì fin il 1459 era Tumein. La baselgia parochiala dal temp medieval tempriv, ina baselgia fortifitgada cun baptisteri situada sin il Crap S. Barcazi, è vegnida erigida, tenor la tradiziun, enturn l'onn 750 da Pippin. Ella è vegnida bandunada en il temp autmedieval en favur da la baselgia en il vitg da T., il patrun da la quala, s. German, è menz. per l'emprima giada il 1459. La refurmaziun ha gì lieu il 1535. Dals onns 1567, 1616 e 1789 dateschan tschentaments funsils, forestals e com. sco era urdens d'alp, da ca. l'onn 1780 in urden da giurada fitg sever. En il 17. tsch. è vegnida installada a T. ina gronda rait da sauaziun cun conducts d'aua suspendids al Crap S. Barcazi. Fin en il 19. tsch. han existì div. interpresas da commerzi a l'aual Turnigla a T. Mulin. Ferma emigraziun commerziala en l'Italia (o.t. da las fam. Caflisch) durant il 19. tschientaner. L'economia actuala sa basa sin l'industria da construcziun, la mastergnanza e l'agricultura. In'arrundaziun dal terren n'è betg anc succedida a T. Il 2000 lavuravan radund 50% da las persunas cun activitad da gudogn a T. ordaifer la vischnanca, o.t. a Domat. T. appartegna dialectalmain a la Sutselva, ha dentant instruì en scola il sursilvan fin il 2007. L'onn da scola 2007/08 ha T. introducì il rumantsch grischun sco lingua d'alfabetisaziun. Part da la populaziun da lingua rum.: 1920 81%, 1980 46% (LM); 2000 11,1%/23,5% (ML/Lindic). T. furma cun Flem e Tumein in consorzi da scola superiura e posseda in'atgna ovra electrica. Il traffic da transit en Surselva - fin 8'000 autos il di resp. 18'000 durant dis da grond traffic - vegn svià dapi il 1994 cun in tunnel.



Litteratura:
H. Erni, Historia dil signuradi de T. e della vischnaunca de T., 1913; Gem. GR, nr 186, 1981; T., red. da J. Clopath, 2003.

Martin Bundi

lemma precedents TrinTrin, Fuorcla lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :