Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Tinizong-RonaTirol lemma sequent

Tiraun
Citad en la provinza tal. da Sunder, tal. Tirano (uffiz.). 2010 9'238 abitants. En il 12. tsch. era T. ina communitad libra, suttamessa pli tard als Capitanei da Stazzona (ch'han laschà construir il chastè a Piattamala a l'entrada en il Puschlav), alura a Com. Cun l'incorporaziun a Milaun (Visconti) è T. daventà il 1335 il lieu da dretgira dal Terziero Superiore. Il 1487 han ils Grischuns conquistà T. e destruì prob. era il vegl chastè da Dosso. Ludovico Sforza ha laschà construir in mir enturn la citad da T. (tenor plans da Giovanni Francesco Sanseverino) ed il nov chastè da S. Maria (igl existan anc restanzas da las portas Poschiavina, Bormina e Milanese), destruids per gronda part il 1512 tras ils Grischuns ch'han occupà T. durant la conquista da la Vuclina. Ils Grischuns han alura installà in podestat a T. Sin ina collina a la sortida dretga dal Puschlav sa chatta la baselgia romanica da S. Perpetua, situada a la veglia senda da sauma da T. a Brüsch che maina vers il Pass dal Bernina. En il temp curretic era agiuntà in albiert (Xenodochium) a la baselgia ch'era in lieu da pelegrinadi ed ina fundaziun schumellina da S. Romerio sur Brüsch. A l'ost da quella è vegnida erigida - suenter appariziuns miraculusas da la vergina Maria tr. il 1505 ed il 1528 - la baselgia da pelegrinadi da Madonna di T. En sia vischinanza han las Trais Lias instituì il 1514 la fiera da muvel e rauba (mintgamai durant 15 dis a partir dals 29 da sett./S. Mihel). En il 16. tsch. è T. sa sviluppà ad in center dal stgomi da martganzia e d'ideas e furmava in punct central dal traffic da commerzi tr. il Grischun e Vaniescha sco era tr. Buorm e Milaun. Cun ca. 5'000 abitants enturn il 1589 aveva T. il dumber d'abitants il pli elevà en Vuclina. En il 16. tsch. è naschida era la pravenda ref., per part sut l'influenza da fugitivs religius tal. (Giulio della Rovere e.a.) che celebravan lur cult cun in agen plevon en la baselgia da S. Maria (sparida). Il 1597 ha gì lieu a T. l'emprima disputaziun da religiun publica tr. represchentants dad omaduas confessiuns. Durant il Murdraretsch en Vuclina (1620) èn vegnids assassinads 60 protestants a T. e la citad è vegnida occupada. Dal 1635-36 ha il Duca Henri de Rohan installà a T. ses quartier principal durant sia famusa campagna da las Alps. La segunda fasa dal domini grischun ha durà dal 1639 fin il 1797. T. è restà in lieu impurtant a la ruta commerziala Bernina-T.-Aprica-Brescha-Vaniescha. Il 1797 è T. vegnì incorporà cun la Vuclina a la Republica cisalpina. En il 19. tsch. han commerziants da vin dal Grischun acquistà vignas en ils conturns da T. Il 1910 è la lingia dal Bernina da la Viafier retica vegnida colliada a T. cun la rait da viafier taliana.


Litteratura:
E. Pedrotti, Gli xenodochi di S. Remigio e di Sta. Perpetua, 1938; G. Garbellini, Tirano, il centro storico: storia, arte e architettura, 2009.

Martin Bundi

lemma precedents Tinizong-RonaTirol lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :