Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Uniun chantunala da chant dal Grischun (UCCG)Uniun chantunala da puras lemma sequent

Uniun chantunala da musica dal Grischun
Fundada ils 21-4-1901 a Tusaun en il rom d'in di grischun da la musica sin iniziativa da las musicas da Tusaun e da Cuira. Il 1902 han ins organisà (uffizialmain) l'emprima Festa chant. da musica ch'è stada en realitad gia la quarta (suenter il 1845, 1882 e 1901). Il mument da la fundaziun da l'uniun chant. existivan ca. 50 societads, otg eran entradas immediat en l'uniun: Harmonia Cuira, Tavau, Tusaun, Glion, Panaduz, Andeer, Bravuogn e Filisur.
La societad la pli veglia è - tenor la tradiziun orala - quella da Domat, fundada il 1803. Il 1812 è doc. la Musica militaris da la Scola claustrala Mustér, il 1822 la fundaziun da la musica dals cadets da la Scola chant. a Cuira. Il 1823 èn suandads Tusaun ed il 1830 Maiavilla. Il 1824 è doc. ina musica militara voluntaria ch'era sa preparada per sunar sin il champ d'exercizis da las truppas fed. a Wil/SG. Il 1842 èn ils tregants da l'Engiadin'Ota sa preschentads cun in'atgna musica instrumentala. Il 1845 è attestada ina Societad grischuna da musica instrumentala, fundada e dirigida dal scolast da musica Jakob Häfelin. Quella ha organisà ils 20-7-1845 l'emprima Festa chant. da musica a Glion cun la participaziun dals cadets da la Scola chantunala evang. da Cuira e las musicas da Glion, Mustér e Cuira. Dapi alura n'audan ins pli nagut dad ella, era betg il 1862 cura che l'Uniun fed. da musica è vegnida fundada. Durant quels decennis dominavan las giuvnas uniuns da chant, da tir e da gimnastica la scena. Las fundaziuns da las musicas èn succedidas cun intgin retard pervi da las difficultads da recaltgar daners per instruments e notas. I mancavan era anc ils dirigents. La Festa chant. da musica dal 1882 a Cuira ha dà novs impuls: ins ha fundà novas uniuns, autras èn vegnidas schliadas, p.ex. Riein il 1893. L'emprima musica da las vals tal., l'Harmonie Helvétique, è vegnida fundada a Paris il 1877 d'emigrants dal Mesauc e suenter sia dissoluziun refundada il 1907 a Mesocco sut il num Armonia Elvetica. Dal 1879 datescha la Filarmonica comunale di Poschiavo. Il 1896 ha l'uvestg scumandà la musica instrumentala en baselgia (cat.).
Suenter la fundaziun da l'Uniun chant. da musica dal Grischun il 1901 vegnivan las festas chant. da musica organisadas regularmain, l'emprim mintga dus enfin quatter onns, a partir dal 1947 mintga quatter onns: il 1902 a Cuira, il 1904 per l'emprima giada en Surselva (Glion), il 1913 en Engiadina (Samedan), il 1920 en il Grischun Central (Filisur). Las duas guerras mundialas han interrut la plipart da las activitads - ils musicants eran en servetsch militar. Ils emprims indizis da scolaziun davart l'Uniun chant. da musica dal Grischun chatt'ins il 1919, l'emprim curs da dirigents è doc. per il 1926 (Tusaun). In'acziun da piunier en Svizra è stà il curs per musicants giuvens dal 1943. Il 1951 ha l'uniun festivà a Tavau ses 50. anniversari cun 82 societads e 1'907 musicants activs. Il 1968 dumbrava ella 86 societads, il 2000 100, il 2010 93. Il 1976 è vegnida fundada l'uniun da veterans. Il 1973-95 è stà il grond temp da scolaziun d'instrumentalists e dirigents, e dapi il 1991 vegn organisà mintg'onn in'emna da musica per giuvenils. Dirigentas èn stadas raras fin il 1990, en il curs dal 1999/2000 percunter era la mesadad dals participants dunnas, ed era il dumber da musicantas crescha d'incuntin. L'Uniun chant. da musica dal Grischun è organisada en quatter districts: I Engiadina-Val Müstair-Puschlav-Bergiaglia; II Tschintg Vitgs-Signuradi-Partenz-Tavau; III Grischun Central-Plessur-Il Plaun-Val Stussavgia-Mesauc-Calanca; IV Surselva.


Litteratura:
R. Alig, A. Spescha, Uniun chant. da musica dal Grischun 1901-2001, 2001.

Adolf Collenberg

lemma precedents Uniun chantunala da chant dal Grischun (UCCG)Uniun chantunala da puras lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: