Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Tach, MarcusTain lemma sequent

Taglia
Term rum. che designescha ina lezia publica e che correspunda al tud. Schnitz. La taglia succedeva en il temp feudal o.t. sco prestaziun reala u en furma d'in servetsch. Ils cumins e vischinadis da las Trais Lias n'enconuschevan nagina obligaziun fiscala a pro da las singulas Lias resp. da la Republica. Quella vegniva alimentada da las entradas da dazis, pensiuns, annatas (p.ex. per dretgs da passadi accordads a truppas estras, recrutaziuns da mercenaris), dad entradas administrativas da las Terras subditas (il daner da chombra/Camera dominicale) e da dazis incassads a la fin dal 18. tsch. sin l'import da products da luxus. Quellas entradas vegnivan medemamain tagliadas sin las Lias e repartidas da quellas sin lur dretgiras autas e da questas tenor represchentanza sin lur cumins. Ina taglia extraordinaria vegniva medemamain prelevada tenor represchentanza e pudeva vegnir decretada per pajar debits da guerra u per gidar convischins pertutgads da catastrofas (lavinas, incendis e.a.). La Mediaziun ha surpiglià quel sistem il 1803. La taglia annuala e directa per persunas (taglia sin la facultad e sin l'acquist, taglia virila) è vegnida iniziada pir il 1856 - ina consequenza da l'incassament dals dazis tras la Confed. a partir dal 1849. Il princip da la progressiun è vegnì introducì il 1881. Fin il 1945 èn stads ils purs (cun paucas excepziuns) deliberads da las taglias sin il gudogn e sin il muvel.


Litteratura:
P.J. Barblan, Der Staatshaushalt des Kantons Graubünden [...], en: JHGG, 1909, 60-200; O. Gieré, Der Staatshaushalt des Kantons Graubünden [...] (1856-1914), 1916; Töndury, Volkswirtschaft, 174-85.

Adolf Collenberg

lemma precedents Tach, MarcusTain lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: