Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Prader, AndreaPratval lemma sequent

Pralung
Vischnanca polit., cirq. Scanvetg, distr. Plessur, situada en il Scanvetg Dadens, cun ils aclauns e las culegnas da Platz, Litzirüti, Fondei e Sapün. P. sa chatta a la colliaziun la pli curta tr. Cuira e Tavau sur il Pass da la Striera. 1384 die lang Wise, tud. Langwies (uffiz.). 1623 ca. 670 abit.; 1850 358; 1900 285; 1950 383; 1980 286; 2000 303. Scuverta dal piz d'ina lantscha dal temp da fier tempriv a Fondei. Sin iniziativa dal chapitel catedral da Cuira e da la claustra da S. Gliezi è vegnida colonisada a partir dal 1273 la part dadens dal Scanvetg, l'emprim davent da Peist (da quel temp da lingua rum.), a partir dal 1307 tras Gualsers da lingua tudestga. A P., il punct da partenza per las vals lateralas Fondei e Sapün, è vegnida erigida il 1385 la baselgia da Nossadunna (collatura exequida da la claustra da Faveras). Il cumin da P. è sa furmà enturn il 1400 sco fusiun dals vischinadis da P., Prada, Fondei e Sapün en il Scanvetg Dadens (senza Arosa), abitads da colonists da lingua tudestga. La suveranitad territoriala han exequì fin il 1338 ils de Vaz, alura ils de Werdenberg, il 1363 per l'emprima giada ils Toggenburgs. A partir dal 1436 ha constituì P., ens. cun S. Peder, ina dretgira auta da la LDD. Cuntrari al Scanvetg Dadora, quella giada anc da lingua rum., possedeva P. in'atgna dretgira bassa cun libra tscherna dal landamma, sco quai che la brev da libertad dal 1441 cumprova. Ils novs signurs territorials èn stads ils Montforts a partir dal 1437, suandads dals Matschs il 1471 e dals Austriacs il 1479. Enturn il 1530 ha P. adoptà la cretta refurmada. Il 1652 è la vischnanca sa cumprada ora dals dretgs signurils austr., il 1657 dals dretgs feudals episcopals. Dapi il 1851 furma P., ens. cun las vischnancas dal Scanvetg Dadora e cun Arosa (dapi il 1857), ma senza Prada, il cirquit dal Scanvetg entaifer il district da la Plessur. Il 1875-77 è vegnida construida la via charrabla da Cuira enasi, il 1888-91 enfin Arosa. Dapi il 1914 existan a P. ed a Litzirüti staziuns da la Viafier d'Arosa. Ils aclauns da Fondei e Sapün en las vals lateralas da P. n'èn betg pli abitads l'entir onn. Il 2005 lavuravan 59% da las persunas cun activitad da gudogn a P. en il sectur terziar.


Funtaunas:
RQGR I/2.

Litteratura:
Kdm GR 2, 186-92; E. Meyer-Marthaler, Langwies und die Anfänge seines Gerichtes, en: BM, 1977, 329-54; R. Furter, Langwies, Umsiedlungen und Umnutzungen 16.-20. Jahrhundert, en: BM, 2000, 59-72.

Jürg Simonett

lemma precedents Prader, AndreaPratval lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :