Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Pozzi, Samuel-JeanPrader, Andrea lemma sequent

Prada
Anteriura vischnanca polit., cirq. Curvalda, distr. Plessur. Fusiunada il 2009 cun Tschiertscha a la vischnanca polit. Tschiertscha-P. Il vitg construì lung la via cumpiglia las duas parts Innerpraden (a 1100 m) ed Usserpraden (enfin a 1250 m), situadas sin la spunda sanestra dal Scanvetg. 1488 Praden, tud. Praden (uffiz.). 1803 150 abit.; 1850 144; 1900 131; 1950 98; 1980 51; 2000 101. La cuntrada da P., urbarisada da Rumantschs, è vegnida colonisada enturn il 1300 tras Gualsers domiciliads a Pralung. La culegna era en il temp medieval in feud ereditar da la claustra da S. Gliezi e dal chapitel catedral da Cuira. Il domini han exequì ils de Vaz fin il 1338, alura ils de Werdenberg ed a partir dal 1363 ils de Toggenburg. P. furmava in vischinadi dal cumin da Pralung cun participaziun a la dretgira bassa e tscherna libra dal derschader. Il 1488 è attestà in agen cuvitg per P. Ils novs suverans èn stads ils Montforts a partir dal 1437, suandads dals Matschs il 1471 e da l'Austria il 1479. P. ha appartegnì ecclesiasticamain a S. Gieri/Castiel, pli tard a la chaplutta dals SS. Giachen e Cristoffel a Tschiertscha, doc. 1405. Enturn il 1530 ha la vischnanca adoptà la cretta ref., ed il 1629-42 ha ella obtegnì in'atgna baselgia. Il 1652 ha P. cumprà ora ils dretgs signurils, il 1657 ils dretgs feudals episcopals. La vischnanca viviva da l'allevament da muvel, d'in pau agricultura e da la vendita da puma (o.t. tschareschas). Il 1851 è P. passà da Pralung al cirquit da Curvalda. Il 1887-94 è vegnida construida la via charrabla Cuira-P.-Tschiertscha. Grazia a sia politica da domiciliaziun, ha la vischnanca pudì dublar il dumber d'abitants tr. il 1980 ed il 2000. Il 2005 lavuravan 61% da las persunas cun activitad da gudogn a P. en il sectur terziar (o.t. pendularis utrò).


Litteratura:
V. Jenny, Praden, 1983; Gem. GR, 2003, 242 s.; LQ, 10-12-2008.

Jürg Simonett

lemma precedents Pozzi, Samuel-JeanPrader, Andrea lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :