Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Caratsch, Simon [Simeon]Carigiet, Alois lemma sequent

Cardinel
Chavorgia al sid dal Pass dal Spleia che nascha al mir occidental dal Lai dal Munt Spleia ad in'autezza da circa 1900 m sur mar. Orientà l'emprim vers il vest, fa il C. a Soste (1544 m) in schanugl per cuntinuar alura vers il sid en direcziun dad Isola (1280 m). La chavorgia ha ina differenza d'autezza da var 600 m. Ella ha difficultà onns a la lunga il passadi al traffic internaz. nord-sid. Il num C. deriva dal lat. cardo, cardine e signifitga en rum. polesch, encalchen, sco toponim streglia, chavorgia, encarden. Prob. utilisavan gia ils Romans la via dal C. sper quellas sur Pianazzo u Madesimo. Il C. vegniva frequentà sco ch'i para già enturn il 1300, trais giadas n'ha el dentant betg pudì vegnir utilisà fin viaden il 17. tschientaner. Durant il temp dal cronist Johannes Guler von Wyneck (1616) faschevan ins a medem temp diever dal C. e da la via sur Madesimo. A la sortida dal C. maina la via sur Soste, Rasdeglia (S. Agostino) e Mottaletta ad Isola. Il 1703 ha il terzal sura dad Isola, ch'aveva da mantegnair la via, pretendì da las Trais Lias in'amplificaziun da la via dal C. Il 1712 ha il speditur Thomas Massner da Cuira erigì per incumbensa da las Trais Lias in "neüwen weg durch den C., in St. Jacobs Thall". Questa via maina al vest da Stuetta ed a la riva sanestra dal Liro en ina pendenza regulara a Torni. Grazia a la pulvra da siglientar han ins pudì surmuntar ils spelms cun tunnels e galarias. Paracars, tschabargals da lain e tetgs da protecziun garantivan als berniers ina tscherta segirtad. Il traffic ha utilisà quest renumà tschancun da via durant bundant 100 onns. Il 1818-23 è vegnida construida la via commerziala, adattada al traffic da chars e charrotschas; quella manava tras insaquantas galarias e tunnels da Stuetta a Pianazzo per dumagnar en numerus carauns la spunda da Tschentsch/Cien a Campodolcino; questa via serva per part anc oz al traffic motorisà. In passadi istoric tras la chavorgia dal C. è vegnì renovà e fa part oz da la Via Spluga (ina senda culturala da Tusaun a Clavenna).




Litteratura:
M. Bundi, Zur Geschichte des Splügenpassgebietes, en: TG, 1969, nr 2, 98-106; Planta, Verkehrswege 4, 37-152.

Martin Bundi

lemma precedents Caratsch, Simon [Simeon]Carigiet, Alois lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: