e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Bravuogn, Crap da Brescha  Breil Vischnanca polit., cirq. Mustér, distr. Surselva (avant il 2001 Rain Anteriur). La vischnanca cumpiglia il vitg principal da B., situà sin ina terrassa al nord sur la Val dal Rain Anteriur e las fracziuns da Dardin-Capeder (Dardin) sut il vitg e Danis-Tavanasa (Danis, Tavanasa) en il funs da la val. 765 in Bregelo, dapi il 1943 B./Brigels (uffiz.). 1850 1'086 abit.; 1888 848; 1900 859; 1950 1'169; 2000 1'187. B. è sa sviluppà a partir dal temp roman resp. dal temp medieval tempriv. Il 765 ha l'uv. Tello da Cuira regalà a la claustra da Mustér sia curt cun chasa signurila a B., ens. cun bains e subdits a Dardin, Danis, Schlans e Trun. Sin il crest da S. Eusebius sa chattan restanzas d'ina fortezza cun baselgia dal temp medieval tempriv. Marmarola a l'ost da B. era prob. ina migiuria da l'abazia, arsa giu il 1496 (oz ina ruina). A B. vivevan ils uschen. Libers exteriurs da Lags, ina gruppa da ca. 200 persunas ch'è s'acquistada l'admissiun a la dretgira auta da la Cadi il 1536 e ch'ha obtegnì in'atgna dretgira civila il 1542. B. furmava, ens. cun Medel, la terza curt en la Cadi. La pestilenza ha chaschunà il 1550 316 victimas, il 1556 180 ed il 1631 130. L'onn 1738 han ils abitants cumprà ora las dieschmas. La baselgia parochiala da S. Maria a B. datescha prob. dal temp medieval tempriv e vegn doc. il 1185 sco proprietad da la claustra da Mustér. Il 1491 è ella vegnida incorporada a la claustra. Fin en il 17. tsch. era S. Maria la baselgia principala da Dardin, Danis e Schlans. Sin territori com. da B. sa chattavan en tut dudesch baselgias e chapluttas. La vischnanca tradiziunalmain purila tgirava stretgs contacts cun il Glaruna (sur il Pass da la Lembra); ella è stada, grazia als de Latour, in center politic da la Cadi durant il 17.-19. tschientaner. Ils tschancuns da via B.-Vuorz (1870) e B.-Tavanasa (1890) servivan era al turissem da stad ch'aveva cumenzà a flurir a partir dal 1850 (o.t. turissem da cultura). Dapi il 1945 dispona la vischnanca da B. d'ina plazza da tir per truppas da defensiun cunter aviuns, dapi il 1946 è ella in center impurtant da l'economia d'electricitad cun lais da serra e centralas a B. ed a Tavanasa. Cun la construcziun dals implants da skis Pez d'Artgas (1972) è B. daventà in lieu da sport d'enviern. Il 2005 lavuravan 58% da las persunas cun activitad da gudogn a B. en il 3. sectur. La part da la populaziun da lingua rum. è sa diminuida mo pauc durant ils davos 100 onns: 1880 99% (LM); 2000 80,5%/88,7% (ML/Lindic). Il territori da Scatlè al nordvest da B. è dapi il 1911, la Val Frisal dapi il 1999 sut protecziun da la natira. Meglieraziun generala a B. Vitg dapi il 2002. Il 2003 è la culegna da Cathomen (tud. Tomahüs) vegnida vendida ed incorporada a la vischnanca da Sursaissa. Litteratura: Kdm GR 4, 342-482; TG, 1962, nr 5, 352-56; Gem. GR, nr 17, 1981; Müller, Abtei Disentis; LQ, 13-8-2003; M. Friberg e.a., B./Brigels, 2007. Adolf Collenberg  Bravuogn, Crap da Brescha  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: