e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Lia da la Chadé (LCD)
Suenter il declin dal stadi episcopal curretic (Currezia) dal temp medieval tempriv (Cuira [diocesa, prinzi-uvestgieu]) a l'entsch. dal 9. tsch. è quel renaschì parzialmain a partir dal 10. tsch. tras donaziuns dals imperaturs ottons e da lur successurs. Ils territoris episcopals centrals s'extendevan a moda concentrada a las vias da transit nord-sid, surtut lung las rutas dal Set e dal Güglia. En il 14. tsch. aveva l'uvestg la suveranitad territoriala e la giurisdicziun auta en ils Quatter Vitgs sco era en la citad da Cuira, en il Surses, l'Engiadin'Ota e la Val Müstair; en Bergiaglia, en il Schons ed en Valragn possedeva el vegls dretgs feudals, ed en Surselva, Engiadina Bassa ed en il Vnuost disponiva el da bains sparpagliads e da la giurisdicziun bassa.
A partir dal 1363 è sa pegiurada la relaziun tr. l'uvestg e ses subdits. Ils ducas austr. avevan acquistà il contadi dal Tirol (cun la Val Müstair e l'Engiadina Bassa) e tschertgavan da s'acquistar era ils territoris da l'uvestgieu da Cuira. L'uv. Peter Gelyto da la Boemia, ch'era savens absent da ses uvestgieu ch'el administrava mal ed aveva indebità fermamain, aveva cedì l'administraziun seculara e las entradas da quella cunter ina taxa annuala als ducas d'Austria. Il 1366 aveva el era infeudà a quels il chastè da Fürstenburg en il Vnuost. Il 1365 eran sa reunids represchentants dal chapitel catedral, da las valladas grischunas e da la citad da Cuira a Zernez ed ils 29-1-1367 a Cuira per far frunt a quest svilup inquietant. Els represchentavan trais stans: il clerus da la cuort episcopala, las dretgiras da la Tumleastga e dal Schons (sis delegads), dal Surmeir (quatter), da la Bergiaglia (sis), da l'Engiadin'Ota (trais) e da l'Engiadina Bassa (dus), represchentads tras ministerials u auters comm. da la classa dirigenta locala, ed ils burgais da la citad da Cuira. Questa assamblea, che imitava l'exempel dals stans dal Sontg Imperi roman e sa radunava en absenza da l'uvestg, aveva statuì, cunter la voluntad da quel, dretgs da cundecisiun en l'administraziun episcopala e dretgs da controlla en dumondas finanzialas, scumandond a medem temp a l'uvestg da vender, senza lur consentiment, facultads da la Chadé.
Las deliberaziuns dal 1367 n'eran dentant anc betg il resultat d'ina veritabla allianza, mabain quel d'ina cuminanza d'urgenza. Tras la voluntad da sa radunar periodicamain a dietas da la LCD e da survegliar severamain l'administraziun territoriala, aveva la "cumina Chadé" obtegnì adina dapli il caracter d'ina lia. Il 1409 han ils da la Chadé instituì in cussegl ed in curatur per l'administraziun episcopala; els han tschertgà consequentamain da metter sut avugadia il domini feudal episcopal, fin che quel è finalmain vegnì liquidà quasi dal tuttafatg cun ils Artitgels da Glion (1524 e 1526). En il decurs dal 15. tsch. èn vegnids integrads ils Quatter Vitgs, Avras, la part sura da la Val d'Alvra, la Val Müstair ed il Puschlav en il territori da la LCD. Il 1498 è s'associada la LCD, sco stadi allià, a la Confederaziun. A partir dal 1450 èn represchentants da la LCD sa reunids cun exponents da la Lia Grischa e da la Lia da las Diesch Dretgiras per proseguir ina politica exteriura cuminaivla e per organisar dietas federalas. Suenter la Guerra da la Chalavaina (1499) è il Vnuost sa distanzià politicamain da l'uvestgieu da Cuira, ed a partir dal 1570 n'han ils represchentants politics da la dretgira da Suot Chalavaina betg pli participà a las dietas da las Trais Lias.
Il contrat d'allianza, stipulà il 1524 tr. las Trais Lias reticas, ha inizià l'epoca d'ina politica naz. coerenta da la Republica da las Trais Lias. 63 mess represchentavan ussa 52 cumins en la Dieta fed. da la Republica, 22 da quels provegnivan da 17 cumins da la LCD. Cuira è daventà il center da la LCD ed il lieu da reuniun da sias dietas. Il burgamester regent da Cuira è stà fin il 1700 a medem temp era chau da la LCD (bundspresident; Sentenzia da Malans). Insaquantas fam. influentas han perquai transferì lur domicil a Cuira. En la successiun da las Trais Lias sa chattava la LCD, suenter la LG, en la segunda posiziun. A partir dal 1541 ha la tscherna da l'uvestg provocà differenzas cun l'uvestgieu, ed il 1550 han la sigillaziun ed il presidi manà a cuntraversas cun la LG. L'urden statal da las Trais Lias è sa mantegnì fin il 1798, ma la LCD è restada, sco la LG e la LDD, dal 1803 fin il 1854 part integrala da l'organisaziun politica dal chantun Grischun (Constituziuns).
Archiv:
ASGR, actas dal pajais.
Funtaunas:
Wagner/Salis, Rechtsquellen; SSRQ GR.
Litteratura:
Pieth, Bündnergeschichte; Festschrift 600 Jahre Gotteshausbund, 1967; Head, Demokratie; HbBG 1 e 2; IG, 114 s.; Simmen, Wappen.
Martin Bundi
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Lia da la chadaina (1637)