Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents LantschLanz, Rudolf lemma sequent

Lantsch Sut
Vischnanca polit., cirq. Tschintg Vitgs, distr. Landquart (enfin il 2001 Landquart Sut), anteriur signuradi (fin il 1803) e chastè. Il vitg aglomerà, situà al nord da Cuira a la riva sanestra dal Rain, ha ina fatscha d'impurtanza naziunala. Sin la spunda dal Calanda, a 1400 m, sa chatta l'aclaun Batänja ch'era abità fin il 1868. 1149 Lanze, 1370 Lentz inferior, tud. Haldenstein (uffiz., entrà en diever ens. cun la germanisaziun a partir dal 14. tsch.). 1803 349 abit.; 1850 492; 1900 464; 1950 521; 2000 808.
Chats dal temp neolitic, dal temp da bronz mesaun e dal temp da fier tardiv sin l'uschen. Hexabödeli al nord dal chastè da Lichtenstein ed en vischinanza dal chastè da Haldenstein sco era la scuverta d'in champ da fossas sin l'uschen. Stein dattan perditga d'ina colonisaziun tempriva. En l'areal dal chastè han ins chattà restanzas d'ina colonia rom. dal 1. tsch. (tardiv) fin il 4. tsch. s.C.

Signuradi

Il territori dal signuradi da L. appartegneva en il temp autmedieval a la curt roiala da Cuira. L'onn 960 ha regalà l'imp. Otto I il signuradi ed il guaud Oldis (en vischinanza da L.) a l'uv. Hartpert da Cuira. Il 1050 ha Heinrich III transferì a l'uvestgieu era l'entir territori da guaud da L. ch'è daventà qua tras ina part da la domena d'immunitad episcopala. Tr. il 1180 ed il 1282 è L. passà, prob. sco feud episcopal, als baruns von Lichtenstein. Suenter lur extincziun è L. vegnì attribuì als chavaliers von Haldenstein, doc. per l'emprima giada il 1260. Oriundamain ministerials episcopals, pli tard dals baruns de Vaz, èn quels vegnids involvids a la fin dal 13. tsch. en il cumbat da pussanza tr. l'uvestg ed ils de Vaz. A la fin dal 14. tsch. è la lingia masculina s'extinguida, e suenter la mort dad Anna von Haldenstein, restada senza descendenza, è passà il domini il 1404, suenter cuntaisas ereditarias,  a sia cusrina Ursula von Hohenems e ses consort Peter von Grifensee. Il 1424 ha quel acquistà tut ils dretgs a L. ed ha surdà l'aclaun Seuils als frars Batänjer. Suenter il 1460 è L. passà a ses schender Heinrich Ammann von Grüningen, suenter la mort da quel als signurs de Marmels. Tras maridaglia cun Hilaria de Marmels è alura Jean Jacques de Castion, ambassadur franz. tar las Trais Lias, vegnì en possess dal signuradi da L. Il 1567 ha Gregor Carl von Hohenbalken acquistà L., pli tard Heinrich von Tägerstein ed il 1608, cunter l'opposiziun dals subdits, Thomas von Schauenstein. Il 1611 ha quel obtegnì da l'imperatur il titel da barun ed il 1612 il dretg d'asil sco era ils dretgs da batter munaida, da tegnair fiera e d'amplifitgar la vopna. Dal dretg da batter munaida han ils baruns profità fermamain fin en il 18. tsch., lur munaidas han dentant gì per temps in nausch renum. Il 1701 è L. passà tras ierta als Salis-Maienfeld ch'han exercità la suveranitad fin il 1803. Il 1701 ha Johann Luzi von Salis abolì la sclavaria. La barunia da L. n'ha mai fatg part dal sistem d'allianzas da las Trais Lias, ha però stipulà il 1558 cun quellas in contract da protecziun, mess en vigur pir suenter lungas dispitas cun ils lieus confederads che regivan a Sargans.
Il signuradi da L. aveva trais chastels:
il chastè da Haldenstein, erigì enturn il 1150 sin in grip sur la vischnanca, era la sedia da fam. dals chavaliers von Haldenstein e furmava il center dal cumplex da bains signurils. Il 1299 han amplificaziuns dal chastè, exequidas senza permissiun, provocà in conflict tr. l'uvestgieu e Johann de Vaz. Abità anc il 1695, è il chastè vegnì destruì il 1769 e 1787 parzialmain tras terratrembels;
il chastè da Lichtenstein, construì en il 12. tsch. sin in spelm al nord da la vischnanca, era la sedia dals signurs von Lichtenstein; suenter lur extincziun a la fin dal 13. tsch. è el passà als signurs von Haldenstein. Il chastè era abità anc il 1400 ed è vegnì bandunà prob. en il 15. tsch.;
il chastè-cuvel da Grottenstein, il temp d'origin dal qual n'è betg enconuschent, sa chatta al pe d'ina paraid-crap dal Calanda.

Vischnanca

L. ha appartegnì  ecclesiasticamain dapi il 1436 a la claustra da S. Gliezi a Cuira. La baselgia, menz. enturn il 1150, è vegnida remplazzada il 1732 tras in nov edifizi; ella è la suletta baselgia da la diocesa da Cuira deditgada a s. Gereon. Enturn il 1616 ha Thomas von Schauenstein introducì la refurmaziun a L. En il 14. tsch. è la colonia oriundamain rum. vegnida germanisada. Il 1803 (Mediaziun) è la vischnanca da L. vegnida attribuida sco vischnanca politica autonoma al cumin dals Quatter Vitgs. Il 1825 è ella daventada la victima d'in incendi, ed era il 1943 fiss ella per il nair da l'ungla puspè vegnida destruida tras in terribel incendi da guaud al Calanda. Suenter l'inundaziun dal 1868 è il Rain vegnì mess en rempars, ed ins ha qua tras pudì gudagnar terren cultivabel. Il 1971 ha ina bova sutterrà parts da la vischnanca. Il 1896 è vegnida construida la staziun da la VR da L. sin territori da la citad da Cuira. Ina punt da betun remplazza dapi il 1972 la veglia punt da lain cuverta sur il Rain. In deposit dad ieli, planisà en ils onns 1980 en ina chaverna, n'ha betg pudì vegnir realisà per raschuns geologicas e politicas. Il 2005 disponiva la vischnanca da L. da set manaschis agriculs e da pliras interpresas industrialas sco era dad in implant da glera. Malgrà la vischinanza da Cuira ha L. subì in svilup moderà en il sectur da construcziun. Dapi il 1990 èn 65-70% da las persunas cun activitad da gudogn a L. pendularis dal lieu.
Al cunfin sid da la vischnanca da L. è vegnì erigì a l'entsch. dal 16. tsch. in grond chastè. Tr. il 1544 ed il 1548 è quel vegnì amplifitgà tras Jean Jacques de Castion ed equipà a moda luxuriusa, tr.a. cun ritgas tavladiras transferidas pli tard en il chastè da Köpenick a Berlin. Il 1731 è il chastè vegnì engrondì per in plaun tras Gubert von Salis, ed il 1732 è el vegnì destruì quasi totalmain tras in incendi, ma restituì immediat. La Chasa Saluz ha alloschà a partir dal 1761 in seminari (Filantropins), transferì il 1763 en il tract nord dal chastè da L. ed il 1771 en il chastè da Marschlins. Il 1832 è il chastè da L. passà als Salis-Soglio ed è vegnì transfurmà danovamain enturn il 1900. Il 1922 è el passà a la fam. Batänjer ed appartegna dapi il 1966 ad ina fundaziun. En ils onns 1986-2005 è il chastè vegnì restaurà per gronda part; sedia da l'administraziun com. da L. 


Litteratura:
Kdm GR 7, 362-73; M. Berger, Rechtsgeschichte der Herrschaft Haldenstein, 1952; G. Lütscher, Geschichte der Gemeinde und Freiherrschaft Haldenstein, 1964 (19952); Clavadetscher/Meyer, Burgenbuch, 297-302; ArGR, 396-418; M. Janosa, Ein frühmittelalterliches Gräberfeld, en: JberADG GR, 2000, 28-42.

Silvio Margadant

lemma precedents LantschLanz, Rudolf lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :