Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Lansel, PeiderLantsch Sut lemma sequent

Lantsch
Vischnanca polit., cirq. Belfort, distr. Alvra. Vitg lung la via situà a 1294 m sin ina terrassa sin la spunda dretga da l'Alvra. 831 Lanzes, tud. Lenz, uffiz. L./Lenz. 1710 215 abit.; 1850 353; 1900 363; 1950 355; 2000 485. Fastizs d'abitadis che van dal temp da fier tempriv fin a l'epoca romana. L'«Urbari curretic dals bains imperials» (ca. 840) menz. tr.a. la baselgia da S. Maria (oz baselgia da sepultura), in bain roial sco era tschains tributars da dus albierts. L. era en possess dals signurs da Belfort; dal 12. tsch. fin il 1338 han ils baruns de Vaz exercità la suveranitad territoriala. Sco part dal signuradi da Belfort, integrà en la LDD dapi il 1436, è L. passà successivamain als Toggenburgs, Montforts e Matschs ed il 1477 a l'Austria. Dasperas existiva ina communitad da servs ecclesiastics da la LCD, ereditara da la migiuria episcopala da L., che appartegneva al signuradi da Greifenstein. En il rom da la bipartiziun da la dretgira da Belfort (1613) en las mesas dretgiras da Belfort Dadora e Belfort Dadens (cun mintgamai in'atgna dretgira civila) è L. vegnì incorporà a l'emprima. Il 1652 èn vegnids cumprads ora ils davos dretgs austriacs. La chaplutta da S. Cassian, situada a la via per Lai, è menz. il 1405, entant che l'actuala baselgia parochiala cat. da S. Antoni da Padua, construida il 1656 dals chaputschins, è vegnida consecrada il 1663. Ils abitants da L. pratitgavan surtut l'allevament da muvel e l'agricultura, els han dentant era chattà in gudogn supplementar en il traffic da transit en direcziun dals pass dal Set (la via charrabla dal qual è vegnida construida il 1387-90), dal Güglia e da l'Alvra sco era vers la Val da la Landwasser. L. furmava in dals quatter ports a l'uschen. Via Sura e disponiva d'ina susta sco era dal dretg da duana. Il 1834-40 è vegnida construida la via dal Güglia, charrabla sin l'entir tschancun, ed il 1870-73 quella da la Val da la Landwasser che sa sparta a L. per Tavau. La construcziun da chasas da vacanzas, iniziada en ils onns 1960, è s'intensivada en ils onns 1970. A l'entsch. dals onns 1980 era il dumber d'abitaziuns da vacanzas superiur a quel da las abitaziuns abitadas durant l'entir onn. Il 2006/07 disponiva la vischnanca da 563 letgs per esters (80% en abitaziuns da vacanzas) e 200 plazs da campadi. Total pernottaziuns: 32'324. Part da la populaziun da lingua rum. 2000: 36,7%/51,3% (ML/Lindic). L'onn 2000 èn l'emprima e la segunda classa primara vegnidas fusiunadas cun Brinzauls.


Litteratura:
Kdm GR 2, 349-70; K. Egli, Die Landschaft Belfort im mittleren Albulatal, 1978; Gem. GR, nr 73, 1982; L./Lenz - Ina vischnanca ier ed oz, red. G.P. Simeon, 2009.

Jürg Simonett

lemma precedents Lansel, PeiderLantsch Sut lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :