Logo und Banner  

  Lexicon Istoric Retic (LIR)

Lemma    
Chavazzin

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z


stampa

lemma precedent Calfraisa Calvenzano , Gion Antoni  lemma sequent

Calonder , Felix
* 7-12-1863 (Felix-Louis) a Scuol, † 14-6-1952 a Turitg, ref., da Trin. Figl da Johann, impressari, e dad Ottilia n. Mani. ∞ 1892 Ursulina n. Walther, figlia da Thomas, directur d'ina bieraria a Napel, da Tartar. Scola primara a Trin, alura Scola chant. a Cuira 1878-81 (senza conclusiun). Activitad commerziala a l'exteriur (trais onns), e suenter la matura a Turitg stud.iur. a Turitg, Minca, Paris e Berna 1885-89, dr.iur. 1889 (tar Carl Hilty). Suenter dus onns actuar da la Dretgira chant. grischuna, ha C. avert il 1890 in'atgna pratica d'advocat a Cuira. El è daventà enconuschent tras ses engaschament en favur da la Revoluziun tessinaisa («Ein offenes Wort über die Tessiner Revolution», 1890). Dal 1891 fin il 1913 è C. stà comm. dal Cussegl grond (pres. 1896 e 1899), nua ch'el è sa distinguì surtut en dumondas da dretg, da traffic e d'educaziun. Il 1893 ha el candidà, senza success, per la Regenza. A la Partida lib. dal Grischun, ch'el ha presidià durant blers onns, ha el conferì ina structura fixa. El è s'engaschà o.t. en favur dal project per ina viafier dal Spleia. Sco comm. dal Cussegl dals chantuns 1899-1913 ha el succumbì il 1912 ad Edmund Schulthess en l'elecziun cumplementara per il Cussegl federal. Ils 12-6-1913 ha l'Assamblea fed. alura elegì C., sco segund Grischun ed emprim Rumantsch, en il Cussegl fed. (vicepres. 1917, pres. 1918), nua ch'el ha dirigì il Dep. da l'intern fin la fin dal 1917 ed il Dep. politic dal 1918 fin il 1919. Durant la chauma generala dal nov. 1918 ha C. targlinà l'emprim, alura ha el adoptà e defendì, sco pres. da la Confed., la lingia severa proseguida dals chaus da l'armada e da la maioritad burgaisa dal Parlament. En la politica exteriura è el s'engaschà o.t. per l'adesiun da la Svizra a la Societad da las naziuns e per il passadi da la neutralitad absoluta a quella differenziada. Per raschuns da segirtad e da politica da traffic ha C. sustegnì ina colliaziun dal Vorarlberg a la Svizra, el n'ha dentant betg chattà ina maioritad en il Cussegl fed. ed ha perquai demissiunà ils 21-1-1920. Per incumbensa da la Societad da las naziuns ha C. surveglià dal 1922 fin il 1937 davent da Katowice l'applicaziun da la cunvegna tr. la Germania e la Pologna davart la Silesia Superiura. En il militar è C. stà maior e derschader superiur. Suenter il 1937 ha el manà in biro da consulenza giuridica a Turitg. Undrà cun il Curtin d'onur da la LG a Trun.
 

Archiv:
Relasch en possess d'ina biadia a Turitg.

Ovras:
Ein Beitrag zur Frage der schweizerischen Neutralität, 1890.

Litteratura:
Bedeutende Bündner 2, 341-64; J. Simonett, Felix C., en: Die Schweizer Bundesräte, edì dad U. Altermatt, 1991, 327-32; P. Stauffer, Der patriotische Internationalist, en: BM, 2005, 3-21.

Jürg Simonett

lemma precedent
 Calfraisa

Calvenzano , Gion Antoni
 lemma sequent


pagina precedenta


©HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna.Per tut ils texts publitgads a moda
electronica valan las medemas reglas sco per la publicaziun stampada.





Redacziun LIR Adolf Collenberg Via Au' Alva 9 7016 Trin Mulin tel.+41 81 353 59 33 E-mail: colado@bluewin.ch
Redaktion HLS Hirschengraben 11 Postfach 6576 3001 Bern tel. +41 31 313 13 30 Fax +41 31 313 13 39 E-mail: : info@dhs.ch