Logo und Banner  

  Lexicon Istoric Retic (LIR)

Lemma    
Chavazzin

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z


stampa

lemma precedent Zulauf , Christine Zurr , Peter  lemma sequent

Zuoz
Vischnanca polit., cirq. Engiadin'Ota, distr. Malögia. Anteriura chapitala dal cumin e da la dretgira auta da l'Engiadin'Ota. Il center vegl da la vischnanca aglomerada è situà sin la spunda dal Munt Albanas ed è circumdà da novs quartiers periferics. Ca. 840 Zuzes. 1781 423 abit.; 1850 378; 1900 425; 1930 969; 1941 693; 1950 779; 1960 1'001; 2000 1'353.
Culegna dal temp da bronz tardiv e dal temp da fier da la Cultura da Melaun sin la collina Chastlatsch (1848 m). Prob. lieu d'etappa d'in sistem da traffic interalpin dal temp rom. tardiv e dal temp medieval tempriv. Il 1137/39 ha l'uvestg da Cuira, che possedeva gia il bain Dorta (oz part dal vitg) e la suveranitad en l'Engiadin'Ota, acquistà funs dals conts da Gamertingen (Germania dal Sid) cun in grond bain a Z. e la baselgia da S. Luzi. Il 1244 ha nominà l'uv. Volkart Andreas Planta da Z. chancelier da l'Engiadin'Ota, iniziond qua tras la predominanza da la fam. Planta e dal vischinadi da Z. ch'ha durà fin il 1798. Il 1367 è Z. entrà en la LCD (pravenda gronda La Plaiv) tras il mastral Thomas Planta cun la sigla com. da l'Engiadin'Ota. Il 1462 è sa constituida la vischnanca cumplessiva.
La baselgia da S. Luzi, menz. per l'emprima giada il 1137/39, è vegnida reconstruida enturn il 1200 (nav odierna e part inferiura dal clutger); il 1507 è ella vegnida renovada en stil gotic tardiv, medemamain la baselgia secundara da S. Caterina (1509), menz. il 1438. Las charplinas permanentas tr. Z. e Samedan han provocà il 1438 la separaziun dal cumin d'Engiadin'Ota (ma betg da la dretgira auta) en in Sur ed in Suot Funtauna Merla che correspundeva territorialmain a La Plaiv. Il 1492 èn vegnidas vendidas las davosas entradas episcopalas a la vischnanca d'Engiadin'Ota. Il 1526 ha pers l'uvestg ils dretgs suverans (seculars) tras ils Artitgels da Glion. Durant la Guerra svabaisa han ils abitants da Z. mess fieu a lur citadina per stgatschar qua tras l'inimi. Cun la communalisaziun a partir dal 15. tsch. èn sa separadas successivamain las vischnancas da S-chanf (1518), da La Punt-Chamues-ch (1528) e da Madulain (1534). Il 1554 ha Z. aderì a la cretta refurmada. Il commerzi, ils transports e la conquista da la Vuclina (1512) avevan effectuà ina fluriziun economica e spiertala: fundaziun d'ina scola da latin, codificaziun dal puter/entschatta da la tradiziun litterara rum., students da Z. ad universitads a l'ester, teater religius e profan, chant choral. Las imposantas chasas signurilas e burgaisas ch'èn restadas a medem temp chasas purilas cumenteschan architectonicamain quest svilup. Sper las veglias fam. aristocraticas dals Plantas, Juvaltas e p.p. era dals Salis è sa furmada en il 15. e 16. tsch. ina nova classa dominanta, parzialmain nobilitada tras l'imperatur ed enritgida tras commerzis ed uffizis politics: ils Travers, Schucans, Raschèrs, Jecklins, Wietzels, Danzs e Geers. Suenter ils Scumbigls grischuns (1607/18-39), dals quals Z. n'aveva betg patì fermamain, ha inizià in'emigraziun per motivs economics. En consequenza da la perdita da la Vuclina (1797), da l'aboliziun dals privilegis politics (1798) e d'ina ulteriura depopulaziun, che na pudeva betg vegnir cumpensada dals immigrants da Tavau, dal Grischun Central e da las vischnancas ref. da la Surselva, è Z. puspè sa sviluppada ad ina simpla vischnanca purila.
Gia avant la construcziun dal stradun, iniziada il 1836, disponiva l'Engiadin'Ota da bunas vias charrablas; ma pir l'avertura da l'Alvra e dal Flüela han promovì il progress economic. Il 1903 ha Z. obtegnì ina colliaziun cun la Viafier retica a Bever, il 1913 è vegnida averta la lingia Bever-Z.-Scuol. Dapi la fin dal 19. tsch. è Z. sa sviluppà ad in lieu da cura cun plirs hotels. Cun la fundaziun dal Lyceum Alpinum (1904) e l'avertura da la scola d'igiena Bellaria (1909) e da la scola secundara communabla per La Plaiv, è Z. daventà il center da scola regiunal. Dapi ils onns 1950 è sa sviluppà il turissem al sectur economic il pli impurtant cun la construcziun da runals, d'ulteriurs hotels e da chasas da vacanzas. La mecanisaziun da l'agricultura, fin alura predominanta a Z., ha provocà ina reducziun dals bains purils per dus terzs (stabiliments moderns a l'ur da la vischnanca). Clavads ed uigls vids en il vitg èn vegnids transfurmads en chasas d'abitar, resguardond il meglier pussaivel il maletg istoric dal vitg. Il 1980 han tut las fam. domiciliadas a Z. pli ditg che 50 onns obtegnì il dretg da burgais. Z. furma actualmain il center economic e cultural da La Plaiv. Part da la populaziun da lingua rum.: 1880 85,2%; 1941 56,0%; 1980 38,9% (LM); 2000 25,8/46,5% (ML/Lindic).

Litteratura:
C. Wieser, Z., Geschichte und Gegenwart, 1991; D. Giovanoli, Z., das Dorf, die Häuser und ihre früheren Bewohner, 2005².

Constant Wieser

lemma precedent
 Zulauf , Christine

Zurr , Peter
 lemma sequent


pagina precedenta


©HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna.Per tut ils texts publitgads a moda
electronica valan las medemas reglas sco per la publicaziun stampada.





Redacziun LIR Adolf Collenberg Via Au' Alva 9 7016 Trin Mulin tel.+41 81 353 59 33 E-mail: colado@bluewin.ch
Redaktion HLS Hirschengraben 11 Postfach 6576 3001 Bern tel. +41 31 313 13 30 Fax +41 31 313 13 39 E-mail: : info@dhs.ch