Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Sprecher, Salomon (von Bernegg)Sprecher, Theophil (von Bernegg) lemma sequent

Sprecher, Salomon (von Bernegg)
* 14-12-1697 a Cuira, † 14-9-1758 ad Aussig (Boemia), ref., da Tavau. Figl da Johann Andreas, landamma, e da Maria n. Terz, da Cuira. Frar da Johann Andreas. ∞ 1) 1722 Dorothea Maria n. S. von Bernegg, figlia da Johann, lt en servetsch spagnol. 2) 1738 Elisabeth Ursula n. Buol, figlia da Stephan Buol. Gimnasi a Halle. Lt en servetsch spagn. 1717, cumissari da guerra en la Lumbardia 1728. Il 1736 è entrà S. cun il regiment de Schauenstein, il 1743 cun in agen regiment en servetsch da l'imperatura Maria Theresia ed ha cumbattì cun success en la Guerra da successiun austr. en l'Italia Settentriunala ed en l'Italia Centrala cunter il retg da la Sicilia. Il contract d'allianza tr. la Gronda Britannia ed il Grischun, preparà dad el il 1742-45, n'ha betg pudì vegnir stipulà. Il 1746 è el daventà Obristfeldwachtmeister. Suenter l'assedi da Genua dal 1748 e la relaschada da ses regiment, è S. stà cdt da citad e 1751-58 guvernatur da Com. Il 1754 è el vegnì nominà lt feldmarschal. En la Guerra da set onns è S. sa distinguì tar l'assedi da Prag ed è perquai vegnì numnà general da l'artigliaria il 1757. Sco cumandant austr. da la garnischun da Breslovia ha S. stuì sa render suenter la Battaglia da Lissa il nov. 1757 al retg Friedrich II da Prussia. La dretgira da guerra, pretendida dad el sez, ha però accordà ad el cumplaina satisfacziun, e l'imperatura ha promovì S. al feldzeugmaister. Sin via tar in corp d'armada destinà a la Saxonia, dal qual el aveva surpiglià il cumond superiur il 1758, è el disgrazià mortalmain en vischinanza da Prag.
Tr. il 1727 ed il 1738 è S. vegnì elegì sis giadas landamma da Tavau sco era chau da la LDD il 1731/32 ed il 1735/33. Cumbain ch'el sa trategneva solitamain a l'ester, valeva el en il Grischun sco "l'emprim um da stadi" da ses temp. Per metter en vigur il Segund Capitulat da Milaun (1726) ha el approvà l'emigraziun (sfurzada) da las famiglias ref. domiciliadas en il contadi da Clavenna. En il 18. tsch. tempriv è S. stà manader da la partida austr. ed in adversari decidì dals Salis.


Litteratura:
Geneal. Sprecher 1, nr 975, 192-95; Bedeutende Bündner 1, 275-79.

Kurt Wanner

lemma precedents Sprecher, Salomon (von Bernegg)Sprecher, Theophil (von Bernegg) lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: