Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents SedrunSegantini, Gottardo lemma sequent

Segantini, Giovanni
* 15-1-1858 ad Arco (Tirol dal Sid), † 28-9-1899 a Puntraschigna, burgais austr., cat., senza naziunalitad dapi il 1865. Figl dad Agostino Segatini [sic], commerziant ambulant, e da Margherita n. de Girardi. ∞ Bice (Pierina Luigia) n. Bugatti. Suenter la mort prematura da la mamma, è il mat da set onns vegnì dà en tgira ad ina mesa sora a Milaun. Ils onns da giuventetgna, durant ils quals S. è vegnì repetidamain internà en chasas da correcziun, èn stads deprimants. El ha emprendì il mastergn da chalger ed ha lavurà il 1873-74 en l'affar da fotografia ed en la drogaria d'in mez frar a Borgo Valsugana (Trentino). Cun 17 onns è el stà activ sco assistent d'in pictur da decoraziun ed ha frequentà l'Academia Brera a Milaun, nua ch'el ha festegià il 1879 l'emprim success cun il maletg «Il chor da la baselgia da S. Antoni». S. ha avert in agen atelier ed ha chattà in sustegn persistent tar ils martgadants d'art Vittore ed Alberto Grubicy.
Il 1881 è S. sa rendì cun Bice Bugatti en la Brianza, ina regiun rurala al nord da Milaun. El ha malegià en tuns stgirs la vita simpla dals purs e pasturs; a Pusiano (provinza da Com) è naschida l'emprima versiun dal maletg «Ave Maria en la traversada» (1882). Il 1886 è sa domicilià S., ch'aveva ina tenuta anticlericala, cun sia fam. a Suagnign. Vittore Grubicy ha fatg el enconuschent en lungas discussiuns durant l'enviern 1886-87 cun las pli novas tendenzas artisticas en Frantscha. S. ha picturà ina segunda versiun da l'«Ave Maria en la traversada», quella giada en la tecnica dal divisiunissem. En las muntognas cun lur glisch clera ha l'artist chattà ina nova lingua figurativa: el ha conferì a las cuntradas alpinas, observadas dad el cun acribia, ina glischur extraordinaria ed in cuntegn simbolic. Perquai valeva el - sper Ferdinand Hodler - sco renovatur da la pictura da las Alps. Pervia da problems finanzials ha S. translocà il 1894 a Malögia; l'enviern passentava el a Suogl. Per l'Exposiziun mundiala dal 1900 a Paris aveva el projectà in immens panorama da l'Engiadina ch'ha dentant fatg naufragi pervi dals custs exorbitants. Realisads èn vegnids mo ils trais maletgs dal tripticon alpin: «Werden, Sein, Vergehen», ina da las davosas ovras programmaticas da l'epoca. Il settember 1898 è S. vegnì celebrà a l'occasiun da l'emprima exposiziun da la Secessiun a Vienna sco represchentant principal dal simbolissem.
S. ha influenzà div. artists, o.t. Giovanni Giacometti, dal qual el è stà mentur ed ami. Il Museum Segantini a S. Murezzan è vegnì avert il 1908. Ils dus figls, Gottardo e Mario (1885-1916), naturalisads (ens. cun la mamma) a Samedan il 1902, èn mademamain stads picturs artists.


Ovras:
Giovanni Segantinis Schriften und Briefe, edì ed elav. da B. Zehder-Segantini, 1934 (19354).

Litteratura:
A.-P. Quinsac, S.: Catalogo generale, 1982; BLSK, 960-62; Giovanni S., edì da B. Stutzer, R. Wäspe, cat. d'expos. S. Gagl, S. Murezzan, 1999; Blicke ins Licht: Neue Betrachtungen zum Werk von Giovanni S., edì da B. Stutzer, 2004; ÖBL 12, 109 f.; S., cat. d'expos. Riehen/Basilea, 2011.

Beat Stutzer

lemma precedents SedrunSegantini, Gottardo lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: