Logo und Banner  

  Lexicon Istoric Retic (LIR)

Lemma    
Chavazzin

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z


stampa

lemma precedent Mustér , (claustra) Mut  lemma sequent

Mustér , (vischnanca)
Vischnanca polit., cirq. Cadi, distr. Surselva (avant il 2001 Rain Anteriur). M. è la pli gronda da las set vischnancas da la Cadi ed era il lieu principal dal cirquit. La vischnanca cumpiglia M.-Vitg (center) ed ils vischinadis da Mumpé-Tujetsch, Segnes, Acletta, Funs/Clavaniev, Disla, Cavardiras e Mumpé-Medel (meglieraziun generala 1984-98). Cun excepziun dals dus Mumpés cumpiglian ils vischinadis mintgamai plirs abitadis. 765 Desertina, 1127 monasterium Disertinensis, tud. Disentis (uffiz. Disentis/Mustér). La culegna da Brulf, situada da la vart dretga dal Rain Anteriur, è vegnida sutterrada d'ina bova il 1689. M. è il center da la Sursassiala. La vischnanca sa chatta al spartavias per il Cuolm S. Maria/Lucmagn e Cuolm d'Ursera ed è il punct da colliaziun da la Viafier retica e da la Viafier dal Matterhorn-Gottard (antruras Viafier Furca-Alpsu/VFA). Dapi il temp medieval tardiv è M. il lieu da cumin. 1850 1'260 abit.; 1900 1'359; 1950 2'330; 2000 2'172.
Chats dal temp da fier en la curt interna da la claustra 2007 e singuls chats dal temp da bronz e dal temp roman a la periferia da la vischnanca da M. Era sch'ins suppona singulas culegnas per ils temps preistorics, è la Desertina tr. la Currezia e l'Italia lumbarda vegnida colonisada pir a partir dal 7./8. tschientaner. L'istorgia da M. è colliada stretgamain cun l'abazia e cun ses domini, la Cadi. A partir dal 1285 possedevan ils subdits claustrals a M., ultra da la claustra e dals ministerials, in agen sigil. Entant che las curts ed ils aclauns èn restads politicamain senza impurtanza, han ils abitants da M.-Vitg surpiglià ina rolla directiva en la Lia Grischa. En consequenza da la Refurmaziun ha M. engaschà a partir dal 1522 in maiordom per survegliar la facultad claustrala, ed ils vischins avevan perfin il dretg d'eleger l'avat (1538-1614). A partir dal 14. tsch. èn sa domiciliads Gualsers en il territori da M., surtut a Mumpé-Tujetsch ed a Mumpé-Medel. Ils colonisaturs da lingua tud. èn s'assimilads a la lingua rumantscha. Ina ventgina da lur bains ed aclauns èn vegnids bandunads. Ils chastels feudals dal temp autmedieval, tr. quels Travaulta, Ragisch e Chischliun, èn ids en muschna. L'origin da la baselgia principala da S. Gion-Battista, menz. per l'emprima giada il 1261, n'è betg sclerì. La plaiv da M. è vegnida incorporada il 1491 a la claustra, possessura da la collatura, a la quala appartegnevan era las plaivs da Tujetsch e (fin il 1500) Medel. Dal 1648-1818 han exequì chaputschins la pastoraziun a M., alura paders benedictins, dapi il 1879 plevons seculars. Cavardiras è daventà in benefizi da chaplania il 1713, Segnes il 1773. La baselgia da S. Gada, construida il 1100 a la via veglia en la Val Medel, è la pli impurtanta da las 14 baselgias e chapluttas da Mustèr.
Il 1251 cumpara la Cadi per l'emprima giada sco persuna giuridica. Suenter il 1643 possedeva la vischnanca la giurisdicziun cumplaina. L'emprima constituziun com. è entrada en vigur il 1848, e cun l'introducziun da la Const. chant. è M. daventada ina vischnanca politica. La funtauna da s. Placi, menz. il 1740, ha la pli gronda concentraziun da radium da la Svizra ed è vegnida explotada suenter il 1870 per ils bogns da l'hotel da cura Disentiserhof, situads a l'entrada dal vitg. Il 1857 ha M. obtegnì in access a la nova via chant. sur il Cuolm d'Ursera. Il medem onn è vegnida fundada la Stampa Romontscha (stamparia e chasa editura), editura da la Gasetta Romontscha.
M.-Vitg ha gì fin a la fin dal 19. tsch. ina modesta fluriziun. Il turissem da stad ed il commerzi e mastergn han prosperà pir suenter la colliaziun a la VR (1912) ed a la VFA/Furka-Oberalp-Bahn (1926). Il 1952 ha Pius Condrau fundà la chasa editura Desertina ch'è sa deditgada l'emprim a la litteratura rum., pli tard a l'art, a la cultura ed a l'istorgia. Ella è vegnida vendida il 1994 a la Gasser SA ed è passada il 1997 puspè sco chasa editura autonoma a la Casanova Druck und Verlag AG. Dapi il 1960 è M.-Vitg il center da scola dal vischinadi, mo Segnes maina vinavant ina scola primara. Il liceum, installà il 1927 da la claustra, è daventà in center da furmaziun regiunal cun la renconuschientscha sco gimnasi tras la Confederaziun 1944. Suenter il 1965 è sa stabilida a M. in'industria (Landis & Gyr fin il 1988, dapi alura Distec cun fabricaziun da furmas e d'apparats). Dapi l'avertura da las Pendicularas Péz Ault (1971) è M. sa sviluppà a moda rasanta ad in center turistic. La vischnanca gioga ina rolla da piunier sin il champ da la telecommunicaziun e da l'energia solara (Ovra solara Desertasol). Il cussegl com., che cumpiglia 21 comm. dapi il 1973, vegn elegì libramain, igl è dentant usit da resguardar tut ils vischinadis; quests gaudan in'administraziun economica parzialmain autonoma. Il 2005 lavuravan 9% da las persunas cun activitad da gudogn a M. en il sectur primar, 62% en il sectur terziar. Part da la populaziun rum.: 2000 75,3 %/86,3 % (ML/Lindic).
Litteratura:
Kdm GR 5, 2-4, 81-118; G. Gadola, Nies vitg, ses ucleuns e sias uclivas, en: Fegl parochial de S. Gions, 1959-62; Müller, Abtei Disentis; Gem. GR, nr 39, 1983; Disentis/M.: temps vargai, temps present, edì da G. Condrau, 1996; SO, 31-10-2007; Disentis, 2008, nr 1, 2-3.

Adolf Collenberg

lemma precedent
 Mustér , (claustra)

Mut
 lemma sequent


pagina precedenta


©HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna.Per tut ils texts publitgads a moda
electronica valan las medemas reglas sco per la publicaziun stampada.





Redacziun LIR Adolf Collenberg Via Au' Alva 9 7016 Trin Mulin tel.+41 81 353 59 33 E-mail: colado@bluewin.ch
Redaktion HLS Hirschengraben 11 Postfach 6576 3001 Bern tel. +41 31 313 13 30 Fax +41 31 313 13 39 E-mail: : info@dhs.ch