Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents MüstairMustér lemma sequent

Mustér
Claustra da benedictins en la vischnanca polit. da M., appartegnenta a la diocesa da Cuira. Patruns: s. Maria, s. Martin, s. Peder, s. Sigisbert e s. Placi. La claustra da M., situada lung il curs superiur dal Rain Anteriur, è vegnida fundada enturn l'onn 700. 765 Desertina, 846 coenobium Desertinense, 1020 abbatia Tisentinensis, 1127 monasterium Disertinensis. Chats dal temp da fier en la curt interna da la claustra 2007.
Tenor la tradiziun (Passio Placidi, 12. tsch.) ha il muntg francon Sigisbert, inspirà dal spiert irlandais-francon dal missiunar ed avat irlandais Columban a Luxeuil (Vogesas), erigì ina cella en la Desertina. El ha mess quella sut il patrunadi da s. Martin, il sontg dals Francs, dal qual provegn il num da l'abazia. Sigisbert ha obtegnì sustegn da l'indigen Placi, in dals possessurs ils pli pussants menz. en la «Lex Romana Curiensis» contemporana. Placi è vegnì assassinà sin cumond da Victor, guvernatur (preses) da la Rezia a Cuira, e la tradiziun ha fatg da quest assassinat in martiri (la festa dals ss. claustrals Sigisbert e Placi ha lieu ils 11 da fanadur). Ina claustra per propi è M. daventada enturn ils onns 750 sut l'avat Ursicinus. Da l'uv. da Cuira Tello, in figl da Victor, ha M. obtegnì vasts regals ch'eran prob. donaziuns d'expiaziun (Testament da Tello dal 765). Confurm al spiert benedictin èn las vals vischinas, che M. aveva survegnì sco dotaziuns, vegnidas urbarisadas. En il cudesch da fraternisaziun da Reichenau da l'onn 810 figureschan gia 93 muntgs morts e 71 vivents cun nums retics, alemans, francons e lumbards.
Las emprimas baselgias cumprovadas tras exchavaziuns archeologicas (1980-83) dateschan dal 8. tsch. (picturas monumentalas en stil bizantin tempriv). Enturn l'onn 800 suondan duas tipicas baselgias reticas cun sala a trais apsidas (quellas da S. Martin e da S. Maria) e la chaplutta da S. Peder. En la baselgia da S. Martin sa chattava la cripta da S. Placi che furma cun quella da S. Gliezi a Cuira ina da las pli veglias criptas da la Svizra. Tenor la tradiziun è il cumplex claustral dal temp carolingic vegnì destruì tras ils invasurs "ungarais", tenor la perscrutaziun tras ils Saracens (enturn il 940). Sco protectura dal Cuolm da S. Maria (Lucmagn) ha la claustra da M. laschà eriger ospizis lung la via dal pass. La politica dals pass alpins, proseguida dals imperaturs germans, ha era interessà la claustra imperiala da M. Sut il domini dad Otto I (962-973) ha M. obtegnì numerusas donaziuns, confermadas da ses successurs. L'imperatur saxon Heinrich II (1002-24), che preferiva il Brenner al Cuolm da S. Maria, ha cedì M. il 1020 al chapitel catedral da Brixen (Tirol dal Sid). La claustra è restada alura ina marionetta dals imperaturs. Ella è puspè vegnida privilegiada sut Friedrich I Barbarossa (1152-90) ch'ha engrondì ses possess en la Lumbardia. Il domini claustral, numnà Casa Dei resp. Cadi, s'extendeva il 1185 da Breil al Pass dal Furca. Ils avats exercitavan la giurisdicziun criminala sur la glieud da la Chadè e possedevan il dretg da fiera; els han era fundà plaivs independentas. Lur domini è però prest vegnì indeblì: administraturs laics èn doc. per Ursera (1203) e Medel (1322). Sco convent imperial era la claustra da M. apparentamain suttamessa gia en il 12. tsch. ad in chastellan. Questa funcziun è vegnida exercitada, en servetsch dals conts de Lenzburg, da la fam. de Torre, il 1213 da Heinrich de Sax-Mesauc ed, a partir dal 1250, dals conts de Werdenberg (cumprà liber il 1401). En il 12. e 13. tsch. han ministerials erigì lur chastels en il territori dal domini claustral.
Il 1251 cumpara la Cadi per l'emprima giada sco persuna giuridica. I sa tractava d'intermediar tr. il feudalissem e tendenzas autonomisticas. L'avat Johannes da Glion (1367-1401) ha accordà a la Cadi in mastral independent. Il 1395 è stà il medem avat confundatur da la Lia (dals signurs) da Glion ch'ha confermà l'unificaziun politica da las regiuns a la ruta surs. vers il sid. Da quella è sortida il 1424 la Lia Grischa. L'avat Pieder de Pultengia (1402-38) è stà a la testa dals sutsignaders. Il 1472 ha acquistà la claustra da M. il signuradi da Munt S. Gieri, ella ha però stuì conceder a la Cadi ulteriurs privilegis en connex cun la nominaziun dal mastral. Il 1477 è la vischnanca da M. perfin sa segirada il dretg da veto en la recepziun da novizs ed ha surpiglià qua tras la rolla dals avugads claustrals. La claustra percunter ha incorporà ulteriuras plaivs ed ha expandì sia pussanza ecclesiastica fin a Domat. Ils privilegis dals avats èn vegnids confermads tras l'imperatur.
Las midadas effectuadas da la Refurmaziun han rinforzà supplementarmain la pussanza seculara. Ina clausula spez. dals Artitgels da Glion (1524 e 1526) ha garantì la survivenza da la claustra. Il 1536 han adoptà l'avat Martin Winkler (1528-36) e trais muntgs la cretta refurmada. Las autoritads da la vischnanca da M. han però nominà in nov avat e salvà la claustra, o.t. era per tema da perder ils vegls privilegis. Il 1539/40 ha l'avat stuì ceder il chastè da Munt S. Gieri als signurs ref. da Vuorz. Il 1581, durant la Refurma cat., ha l'avat Cristian de Castelberg (1566-84) envidà l'archuv. milanais Carlo Borromeo a M. ed ha rinforzà la refurma tridentina. Era sche l'abazia ha instituì en ils onns 1587-96 in seminari da spirituals, n'èn las stentas per refurmar la claustra e meglierar la furmaziun teol. dal clerus betg stadas fritgaivlas. Cura che l'avat Sebastian de Castelberg (1614-34) ha stuì fugir durant ils Scumbigls grischuns da las truppas da Gieri Genatsch, han las autoritads secularas surpiglià l'administraziun da la claustra. Tras l'intermediaziun dal nunzi e da la Congregaziun svizra dals benedictins, en la quala la claustra da M. è vegnida recepida il 1617, è quella sa revegnida sut la direcziun da l'administratur ed avat Augustin Stöcklin (1634-41) che provegniva da la claustra da Muri/AG. Sut l'avat Adalbert Bridler (1642- 55) è il convent sa separà da l'uvestgieu da Cuira, el ha però cedì a la vischnanca l'entira giurisdicziun. Il 1649 ha la Val d'Ursera cumprà ora ils dretgs feudals da M. Ils avats Adalbert de Medell (1655-96) ed Adalbert Defuns (1696-1716) han laschà eriger il nov edifizi claustral represchentativ en il spiert dal temp baroc e tenor ils plans da Caspar Moosbrugger, frater da Nossadunnaun.
Durant la Segunda Guerra da coaliziun (1799-1801) è la claustra da M. vegnida involvida en ils cumbats tr. la Frantscha e l'Austria. Il pader erudit Placi a Spescha ha empruvà (senza success) d'intermediar. Ils 6-5-1799 èn la claustra e l'entira vischnanca da M. vegnidas messas en tschendra, quai ch'ha chaschunà la perdita da l'archiv e da la biblioteca claustrala sco era da numerusas ovras d'art. L'abazia ha pers tras la Confisca ils possess da Postalesio en Vuclina (circa la mesadad da sia facultad); ella n'è dentant betg vegnida secularisada grazia al fatg che las davosas restanzas dal domini feudal eran gia vegnidas dismessas cun la vendita da Vuorz (1734) e cun l'aboliziun da las dieschmas (1737). Il spiert radical dal cumbat cultural, ch'ha provocà l'aboliziun da numerusas claustras en Svizra, ha era influenzà la sort da la claustra da M. Il 1859 è vegnida suttamessa l'administraziun claustrala a la controlla chantunala. Il 1861 ha la Regenza impedì ultra da quai quasi totalmain la recepziun da novizs. Il medem onn è la giurisdicziun ecclesiastica da la claustra vegnida assegnada a l'uvestgieu da Cuira. Il redactur Placi Condrau da M., il politicher Caspar Decurtins da Trun e Theophil Sprecher von Bernegg da Maiavilla han contribuì fermamain ad in nov pensar en la populaziun ed en la Regenza ch'è stà a la basa da la restauraziun da la claustra. Cun agid da la Congregaziun svizra dals benedictins ha M. uschia pudì sa revegnir. L'avat Benedikt Prevost (1888-1916), mess a disposiziun da la claustra da Muri-Gries (Tirol dal Sid), ha cumbinà l'innovaziun interna cun la fundaziun da la scola claustrala, la pastoraziun ed il pelegrinadi. Il 1895- 99 ha el incumbensà August Hardegger d'eriger la nova baselgia consecrada a s. Maria. Ils avats Beda Hophan (1925-63) e Viktor Schönbächler (1963-88) han consolidà il gimnasi ch'è daventà in center da furmaziun regiunal. Il cumplex claustral è vegnì amplifitgà cun la construcziun da l'internat (Walther Sulser, 1937-40) e dal nov edifizi da scola (Hermann e Hans Peter Baur, 1969-73). Suenter la restauraziun, dirigida da Felix Schmid, ha ospità la baselgia da Hardegger la biblioteca e duas collecziuns, ina da tempra istoric-culturala, l'autra da tempra istoric-natirala. Las exchavaziuns archeologicas dals onns 1980-83 han pussibilità da consolidar la cripta da S. Placi dal temp medieval tempriv, rendida accessibla al public. L'avat Pankraz Winiker ha timunà la claustra dal 1988-2000, succedì da Daniel Schönbächler (2000-). Il 2010 dumbrava il convent 28 profess. 


Litteratura:
Müller, Abtei Disentis; I. Müller, Die Frühzeit des Klosters Disentis, en: BM, 1986, 1-45; HS III/1, 474-512; W. Jacobsen e.a., Vorromanische Kirchenbauten, 1991, 93-95 (t. suppl.); Disentis/M.: temps vargai, temps present, edì da G. Condrau, 1996; Simmen, Wappen, 197-200; W. Studer, Byzanz in Disentis, 2005; SO, 31-10-2007; E. Koch, Ein Buch über die Welt - das Kloster Disentis, 2010.

Daniel Schönbächler

lemma precedents MüstairMustér lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: