Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Corpus catolicCorradini, Mara lemma sequent

Corpus evangelic
Ils Artitgels da Glion dal 1524 e dal 1526 furmavan la basa da l'urden da baselgia da las Trais Lias. La Sinoda retica evang., fundada il 1537, reglava la vita e la ductrina dals plevons. Ella ha salvà sia emprima radunanza formala enconuschenta il 1547. Dumondas da politica ecclesiastica da la Republica, che surpassavan las cumpetenzas da la Sinoda, vegnivan tractandadas e decididas dals mess e da delegads da las confessiuns respectivas, represchentadas dal Corpus evang. e dal Corpus catolic, en occasiun da dietas e congress/pitags. Quest proceder, numnà Itio in partes, è s'etablì suenter ils Scumbigls grischuns. Il Corpus evang. (Corpus evangelicum), numnà en il 17. tsch. Sessiun evangelica, ed il Corpus cat. èn cumparids gia dapi il 1623 sco instituziuns permanentas. La Sessiun evang. tscherniva da mintga Lia in delegà en la Sinoda. L'urden da baselgia da la Helvetica è restà in'episoda. Era sch'il Corpus evang. ed il Corpus cat. han facticamain puspè existì a partir dal 1803, èn els vegnids francads pir en la Const. chant. dal 1854. La Constituziun dal 1880 ha puspè abolì lur status d'instanzas statalas. Ils dus gremis èn però restads de facto en funcziun. Dapi l'introducziun dal nov urden da baselgia evang. dal 1979 ha il Cussegl grond evang. (deputads ref. dal Cussegl grond e 60 delegads dals 10 colloquis) ina funcziun legislativa ed è represchentà cun quatter commembers en il cussegl ecclesiastic (executiva).


Litteratura:
W. Graf, Die Ordnung der Evangelischen Kirche in Graubünden von der Reformation bis 1980, en: JHGG, 1982, 7-93; H. Berger, Bündner Kirchengeschichte, 2. part, 1986; 4. part, 1987; HbBG 2, 218 s.; 3, 232 s.

Adolf Collenberg

lemma precedents Corpus catolicCorradini, Mara lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :