Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Anhorn, BartholomäusAnniversaris lemma sequent

Annalas da la Societad Retorumantscha
Organ da publicaziun da la SRR che cumpara senza interrupziun ina giada l'onn dapi il 1886. Emprima redacziun: Gion Antoni Bühler, Giacun Hasper Muoth ed Alexander Balletta. L'intent primar da questa periodica, formulà en l'introducziun da l'emprima annada, era da servir "alla conservaziun e cultivaziun de nossa lingua materna, alla collecziun de ses monuments ed alla promoziun dell'uniun dels divers dialects". Quest intent vala anc oz, cun excepziun da l'ultim punct ch'ha pers sia impurtanza cun il falliment dal rum. fusiunà da Gion Antoni Bühler il 1887. L'annuari cuntegna litteratura belletristica (raquints, poesias, dramas), artitgels scientifics e scientific-populars davart la lingua, litteratura e cultura rum., davart l'istorgia grischuna, usits ed isanzas, ediziuns da texts vegls e funtaunas da dretg, necrologs da persunalitads d'impurtanza per il moviment rum., sporadicamain era tractats davart la scienza natirala, la geografia e la medischina. Ils scripturs dal 19. tsch. ed ina gronda part da quels da l'emprima mesadad dal 20. tsch. han publitgà lur ovras u parts da quellas en las "Annalas" ch'eran da quel temp ina da las paucas pussaivladads da publicaziun. Davart il cuntegn en detagl infurmeschan las «Annalas» 75/1962 e 100/1987 cun lur registers alfabetics dals auturs e da las materias.


Litteratura:
Annalas, 1/1886, prefaziun (citat).

Felix Giger

lemma precedents Anhorn, BartholomäusAnniversaris lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :