Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Castelberg, Cristian deCastelberg, Gion Teodor de lemma sequent

Castelberg, de
Schlatta grischuna da la medema stirpa u parentada cun ils signurs von Übercastel e von Löwenstein. L'emprim member attestà da la fam. è in Wilhelm, menz. il 1289 en la cunvegna da pasch tr. il barun Heinrich de Razén ed il chavalier Hartwig von Löwenstein. Enturn il 1400 possedevan ils de C. ils chastels da Surcasti, Löwenstein, C. (vischn. da Luven) e Baldenstein. En il temp medieval tardiv sa chattava la fossa da fam. en la baselgia da Luven. Il 1395 èn doc. Hartwig von Übercastel ed Otto de C. sco vasals da l'uvestg da Cuira; Rudolf de C. è stà prefect episcopal en Lumnezia dal 1461-62 ed il 1468. En il 14. e 15. tsch. possedeva la fam. bains o.t. en la Lumnezia, la Foppa, il Schons, la Tumleastga, il Signuradi ed il Vorarlberg.
A l'entsch. dal 16. tsch. ha Johann Gaudenz, figl dal chavalier Johann Christian, fundà la lingia da Glion. Questa lingia, ch'è passada durant la Refurma a la nova cretta, ha schendrà numerusas persunalitads ch'han occupà uffizis impurtants en il cumin da la Foppa (p.ex. quel dal mastral) e da la citadina da Glion (burgamester) sco era, per ulteriurs 200 onns, quel da bandierel da cumin. La lingia da Glion, a la quala ha appartegnì Balthasar, è sparida il 1903.
Johann Christian, il segund figl da Johann Christian, è stà il progenitur da la lingia cat. da Mustér, nua ch'el era sa domicilià en il 2. quart. dal 16. tsch. (prob. per motivs religius) suenter che la citadina da Glion aveva adoptà la cretta ref. (1526). Gia ils dus figls da Johann Christian, Cristian e Sebastian, han occupà uffizis impurtants, garantind a la fam. ina ferma posiziun ch'ella ha mantegnì fin a la fin dal 18. tschientaner. La fam. ha mess numerus mastrals en il cumin da la Cadi; diesch da ses members, tr. ils quals Johann Ludwig, èn stads tr. il 1576 ed il 1799 dapli che trenta giadas landrehters da la LG. Christian, Marian e Sebastian èn stads avats da la claustra da Mustér. Div. members da la fam. èn stads activs sco uffiziers en servetsch da la Frantscha e da la Sardegna, nua ch'els han acquistà p.p. auts grads, sco Joachim Michael Liberat, il colonel Johann (1717-60) e Johann Anton. Anton Benedikt Joachim Theodor (1802-57) è stà activ en servetsch napolitan. Gion Teodor ha occupà div. uffizis avant e suenter il 1798. Menziun spez. meritan en pli ils canonis da Cuira Johann (1656-1739) e Johann Christian (1778-1856). Il lioms genealogics tr. ils de C. e las actualas fam. grischunas dal medem num (domiciliadas a Castrisch, Mustér, Suraua, Schluein e Sumvitg) n'èn betg perscrutads.
 


Litteratura:
Poeschel, Castelberg; Clavadetscher/Meyer, Burgenbuch, 86 s., 98 s.; HS III/1, 500-02, 505; Grimm, Aristokratie, 198.

Ursus Brunold

lemma precedents Castelberg, Cristian deCastelberg, Gion Teodor de lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :