Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents BelmontBelmont, Konrad de lemma sequent

Belmont, de
Schlatta da baruns libers dal 12.-14. tsch., cun possess o.t. a Castrisch ed a Flem. Fin enturn il 1200 residiavan ils B. en il chastè da B. a Fidaz, pli tard en quel da Casti a Castrisch ed en il chastè ch'els avevan laschà eriger il 1250 sin la Tuma Casti a Domat. Els possedevan ils dretgs da giurisdicziun en la Foppa, en la Lumnezia ed a Flem ed avevan l'avugadia sur la curtis a Cuira che appartegneva a la claustra da Faveras. Ultra da quai avevan els il patrunadi sur la baselgia da vallada da S. Vintschegn a Pleif/Vella e la collatura da duas chapluttas affiliadas a Sagogn. Il lieu da sepultura dals B. è stà oriundamain S. Gliezi/Cuira, pli tard la catedrala da Cuira, a partir dal 14. tsch. Castrisch. Ils B. eran parentads tr.a. cun ils de Vaz, de Frauenberg, de Montalt e de Razén. L'emprim represchentant enconuschent da la fam. è Lütfried che cumpara il 1139 tr. las perditgas da la donaziun dals von Gamertingen. Tenor indizis han descendents u ertavels da quel purtà en ils 60 onns sequents il num de Castrisch e reprendì il num de B. pir suenter la cumparsa d'ina fam. Castrisch da noblezza inferiura. Heinrich (attestà dal 1252-62) è stà l'emprim da la fam. ch'ha purtà consequentamain il titel da noblezza. Il 1255 è el vegnì battì, ens. cun auters nobels, da l'uvestg da Cuira en ina battaglia a Domat. En consequenza han ils B. pers il chastè a Domat, erigì pauc avant cun agid d'alliads, ma restituì ad els sco feud episcopal. Il figl da Heinrich, Heinrich il Giuven (attestà dal 1267-1307), ha studegià a Bologna il 1267. El aveva stretgas relaziuns cun ils de Vaz e cun ses frar Konrad, uvestg da Cuira. En il 14. tsch. han difficultads economicas sfurzà la fam. da vender u impegnar ina part dal possess. L'ultim descendent masculin dals B., Ulrich Walter, biadi da Heinrich il Giuven, è s'unì il 1352 cun success cun auters nobels (baruns de Montalt e de Razén) e cun purs da la regiun per far frunt en la Battaglia da Porclas al Mundaun a las ambiziuns d'expansiun territorialas dals Werdenbergs. Sia sora Adelhaid ha maridà en emprima lètg Heinrich IV de Razén. Tras ella è ida l'ierta dals B. a sia figlia Elisabeth ed al consort Kaspar von Sax-Mesauc.



Litteratura:
GHS 2, 3-7; J.L. Muraro, Die Freiherren von B., en: Geschichte und Kultur Churrätiens, edì dad U. Brunold, L. Deplazes, 1986, 271-309; Simmen, Wappen.

Martin Leonhard

lemma precedents BelmontBelmont, Konrad de lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: