Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Caminada, Johann MathiasCamischolas lemma sequent

Caminada, Pietro
* 20-5-1862 a Milaun, † 20-1-1923 a Roma, cat., da Vrin. Figl da Gion Antoni e da Maria n. Turconi, da Milaun. ∞ cun ina Brasiliana. Inschigner. C. ha passentà blers onns sco inschigner da construcziuns idraulicas en Brasilia. En il rom da la reconstrucziun d'ina part da Rio de Janeiro han ins realisà il 1896 la famusa lingia da tram sin ils Arcos da Lapa tenor ils plans da C. ch'ha era elavurà sco emprim in project per la futura chapitala Brasilia. Da return en l'Italia (1907), ha el concepì tr.a. projects per la renovaziun da Roma e da Milaun, per l'engrondiment dal port da Genua e per ina viafier sutterrana en quella citad. Ils projects ils pli gronds da C. èn stads quel da render navigabels ils flums europeics e quel d'ina via d'aua navigabla tras las Alps da la Germania fin a la Mar Mediterrana (Genua), tr.a. sur il Pass dal Spleia (tunnel dad Isola-Punt Crap, 15 km), realisada cun agid da sclusas. Sias ovras «L'avvenire della navigazione interna», «Canaux de montagne» e «Le Autoidroferiche» èn stadas durant decennis in ritg material da studi per inschigners d'idrologia. La Guerra mundiala ha impedì da persequitar sias ideas e da realisar, almain parzialmain, ses plans.


Ovras:
La via d'aqua Transalpina, 1905.

Litteratura:
K. Wanner, Pietro C. und seine «via d'acqua transalpina», en: BM, 2005, 107-27.

Adolf Collenberg

lemma precedents Caminada, Johann MathiasCamischolas lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :