Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents SubviaSüdostschweiz, Die (SO) lemma sequent

Succurs svizzer d'enviern
En il context da la crisa economica mundiala han fundà exponents da l'economia, da l'industria e da la politica svizra il 1936 il Succurs svizzer d'enviern per dischoccupads per cumbatter la paupradad creschenta da tschientmillis pertutgads e per garantir a quels la survivenza durant ils mais d'enviern pli stgars. Il Succurs svizzer d'enviern vegn finanzià cun collectas en furma da daners e natiralias (laina, charvun ed ieli per stgaudar, vestgadira ed autras textilias, buns per retrair mangiativas u vitamins per uffants e.a.). Durant la Segunda Guerra mundiala han ins prestà quest agid sut il num Succurs d'enviern da guerra. Ultra da l'agid gratuit offra il Succurs svizzer d'enviern era materialias per in pretsch reducì, p.ex. textilias. La conjunctura auta dal suenterguerra ed il sistem d'assicuranzas publicas e privatas han diminuì la paupradad, quella è dentant puspè creschida a partir da la fin dal 20. tsch. en furma da persunas che na pon betg viver da lur renta e dals uschen. working poor, v.d. persunas singulas e fam. che na pon betg u mo malamain viver da lur paja. Il Succurs svizzer d'enviern sustegna quellas - tenor la devisa: agid per gidar sasez - cun regals en natiralias, buns da cumpra (per vestgadira d'enviern e.a.) e contribuziuns a scolaziuns e prestaziuns socialas. Ils 31-10-1995 è vegnida constituida la Fundaziun succurs d'enviern dal Grischun (oz Succurs d'enviern dal Grischun, tud. Winterhilfe Graubünden), administrada da l'Uffizi dal servetsch social dal chantun Grischun. Il 2009/10 ha ella sustegnì en total 72 cas (fam. e persunas singulas).


Litteratura:
LQ, 24-11-2006.

Adolf Collenberg

lemma precedents SubviaSüdostschweiz, Die (SO) lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :