Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents RegagliasRegenza lemma sequent

Regeneraziun
La designaziun da la perioda da l'istorgia grischuna suenter il 1830 sco "epoca da la regeneraziun" è giustifitgada mo en analogia a l'istorgia svizra. Tenor Friedrich Pieth "[gingen] die Beseitigung der Mediationsverfassung wie auch die Krisis, von der die übrige Schweiz in den Dreissigerjahren ergriffen wurde, [...] am rätischen Bergkanton vorüber, ohne dessen staatsrechtliche Grundlage sichtbar zu verändern." Peter Liver vegn a la medema conclusiun: "In der Bündnergeschichte beginnt im Jahr 1830 nicht eine neue Periode, sondern die Zeit von 1814 bis 1848 verläuft ohne Umsturz. Die letzten Wirren des Freistaates der Drei Bünde wurden 1814 überwunden." Peter Metz caracterisescha il svilup suenter il 1830 sco "gemächliche Fahrt im liberalen Winde". La voluntad da far midadas mancava, perquai ch'ins temeva - cun raschun en il context grischun - ch'in augment da la pussanza centrala limiteschia l'autonomia communala sacrosancta ed ils dretgs e las libertads corporativas. Ins aveva pir da svegliar la chapientscha per ils dretgs e las libertads individualas dal stadi lib. (modern). L'activitad dals organs statals era limitada al champ da la polizia spezialisada che cumpigliava tr.a. l'urden da sanitad, il traffic ed il transit, la chatscha, la scola, l'economia forestala, las auas (polizia fluviala), il militar ed ils fatgs ecclesiastics. En questas domenas han il parlament e la Regenza grischuna sviluppà - cunter tuttas resalvas ed opposiziuns - in'activitad innovativa remartgabla. L'autonomia giudiziala dals cumins ha dentant impedì ina refurma statala fundamentala. L'iniziativa lantschada dal cumin da la Cadi, ch'ha pretendì il 1833 la dismessa da l'art. 34 da la Const. chant. che bloccava questa refurma, è vegnida sbittada dals cumins, gist sco tut las ulteriuras refurmas iniziadas dal parlament tr. il 1834 ed il 1837. La lavur endinada da l'Uniun refurmistica, fundada il 1842 da Peter Conradin Planta, ha fullà via a la reorganisaziun dals cumins dal 1851 ed a la Const. chant. dal 1854 (Constituziuns grischunas).


Litteratura:
Pieth, Bündnergeschichte, 370 s.; P. Liver, Philipp Hössli 1800-1854, en: Rechtsgeschichtliche Aufsätze, 1982, 426; Metz, Graubünden 1, 349; HbBG 3; IG.

Adolf Collenberg

lemma precedents RegagliasRegenza lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :