Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Sammler, Der [Der Neue Sammler]San Bernardin, Pass dal lemma sequent

San Bernardin
Fracziun da la vischnanca polit. da Mesocco situada a 1608 m. En il temp medieval vegniva quella numnada Gualdo de Gareda, entant che Mons Avium (prob. d'origin prerom.; gallic Ouxello, rum. autezza) designava il Pass dal S. (oz il Pizzo Uccello sur la vischnanca). Tr. il 1450 ed il 1467 è vegnida construida ina chaplutta en onur da s. Bernardin da Siena, dal qual deriva il num actual, doc. il 1661. Sias famusas funtaunas da zulper, magnesium e fier, descrittas dal natiralist svizzer Johann Jakob Scheuchzer il 1717, èn enconuschentas dapi ditg. En ils onns 1867-97 è vegnida erigida ina baselgia radunda en la vischnanca. Il 1967 han ins inaugurà il tunnel dal S. che s'avra immediat davos la fracziun e che garantescha la colliaziun permanenta dal Mesauc cun il rest dal Grischun. Sco center turistic frequentà la stad e l'enviern ha fatg la culegna dapi ils onns 1950-60 in svilup architectonic remartgabel (chasas ed abitaziuns da vacanzas) e dispona da numerus implants da skis (ski alpin e nordic), d'ina buna infrastructura per vacanzas da stad (tennis, minigolf) e d'ina buna offerta da pensiuns, restaurants ed auters servetschs.
 



Litteratura:
P. Mantovani, La strada commerciale del San Bernardino, 1988.

Cesare Santi

lemma precedents Sammler, Der [Der Neue Sammler]San Bernardin, Pass dal lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: