Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Salzmann, Jakob [Jacobus Salandronius]Samignun lemma sequent

Samedan
Vischnanca polit., cirq. Engiadin'Ota, distr. Malögia, situada en il center da l'Engiadin'Ota a la riva da l'En. A la vischnanca appartegnan l'aclaun da Punt Muragl, la part entadim da la Val Bever e quasi l'entira Val Roseg (exclava). 1137-39 Samadene (copia), 1156 Samadn, tud. pli baud Samaden. 1850 412 abit., 1900 967; 1930 1'783; 1950 1'685; 1970 2'574; 2000 3'069.
Il 1288 è attestada ina tur d'abitar («La Tuor») en la part sura dal vitg. Il 1462 è daventada la vischnanca da S., che appartegneva al cumin da Sur Funtauna Merla, la sedia da la dretgira bassa. S. era ina da las trais veglias plaivs grondas da l'Engiadin'Ota. Il 1491 han ins agiuntà a la tur romanica la baselgia da S. Peter dal temp gotic tardiv. La refurmaziun ha gi lieu il 1551. Il 1501 èn menz. per l'emprima giada la chaplutta da S. Bastiaun (demolida il 1914) e quella da S. Antoni ch'ha fatg plazza a l'actuala baselgia parochiala evangelica. A partir dal 1860 è creschida la cuminanza cat., ed il 1911 han ins erigì per els la baselgia dal Cor da Jesus en stil neoromanic. L'onn 2000 eran 49% da la populaziun refurmads, 39% catolics.
Durant la Guerra svabaisa (1499) è la vischnanca da S. daventada victima d'in incendi. A partir dal 16. tsch. han singulas fam., o.t. ils Salis e Plantas, acquistà grondas ritgezzas e laschà construir edifizis pumpus a S. Questas fam. avevan d'engraziar lur bainstanza en emprima lingia als uffizis politics ch'ellas occupavan en las Terras subditas, ma era a l'emigraziun (uffiziers mercenaris, diplomats, pastiziers e.a.). Il 1812 è menz. l'emprim ospital a S. En il 19. tsch. èn sa sviluppads il commerzi e l'industria a S., e quai pli baud ed a moda pli intensiva ch'en auters lieus da la val. Il 1830 ha inizià il svilup turistic ch'ha manà a la construcziun dad hotels (1820 emprim albiert da l'Engiadina, realisà da Johannes Badrutt en la chesa La Resgia), suandads da primascensiuns sin las muntognas da l'Engiadina, da chamonas dal CAS, d'ina plazza da golf (1893), da la funiculara a Muottas Muragl (1907) e da parahotels. L'offerta turistica è vegnida cumplettada pli tard da plazzas da campar. Il 1872 han laschà construir turists engl. la baselgia engl. en stil neogotic (demolida il 1965). Il 1888 èn vegnidas construidas las Ovras electricas d'Engiadina, il 1895 l'Ospidel cirquitel d'Engiadin'Ota. Dasperas èn sa domiciliadas bancas e stamparias a S. Il 1903 è la vischnanca da S. vegnida colliada cun la rait da la Viafier retica ed è daventada il center da viafier en l'Engiadina. Il 1937 han ins avert la plazza aviatica (dapi il dec. 2003 en possess dal chantun Grischun). Il 1943 ha la fam. Planta constituì la Fundaziun de Planta, in center da cultura rumantscha. Il medem onn è vegnì fundà l'Institut evang. S. ch'è daventà il 1958 la Scola media evang., il 1991 l'actuala Academia Engiadina. Il 1-10-1943 è S. vegnì bumbardà per sbagl d'aviuns americans (donns materials). Suenter grondas inundaziuns a partir dals onns 1920 (o.t. il 1952 ed il 1954) ha la vischnanca decidì da metter l'En en rempars e da spustar il Flaz da la vart dretga da la val. Il 2004 è vegnì inaugurà il nov chanal da l'En/Flaz. 
En ils onns 1980 ha S. engrondì sia infrastructura (tr.a. chasa da scola, scola professiunala, Ufficina protetta). Div. uffizis chant. e regiunals han prendì sedia a S. La veglia substanza architectonica vegn destruida successivamain. Per motivs conjuncturals èn vegnids construids novs quartiers e novas vias d'access ch'han transfurmà l'anteriur vitg puril rum. en in center da servetschs modern. S. è la sedia da l'Archiv culturel d'Engiadin'Ota. Part da la populaziun da lingua rum.: 1941 42,1%; 1980 32,9% (LM); 2000 16,7%/42,4% (ML/Lindic), tud. 61,5% (ML) .

 



Litteratura:
Kdm GR 3, 374-88; D. Kaiser, Das Mini-Imperium des Bergdorfes S., 1979; BZ, 22-1-1983; 4-6-1988; D. Kaiser, S.: eine Dorfchronik, 1994; LQ, 12-12-2003; SO, 3-6-2004.

Ottavio Clavuot

lemma precedents Salzmann, Jakob [Jacobus Salandronius]Samignun lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: