Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents CuragliaCurrier lemma sequent

Currezia
La Currezia, 905 Retia Curiensis, numnada era Churwalchen (p.ex. 885 in pago Retia, quod alio nomine Chureuuala appellatur), è resortida da la provinza rom. Raetia prima (Rezia romana) ed era territorialmain l'emprim identica cun l'uvestgieu da Cuira (diocesa). Il svilup politic-territorial da la Currezia po vegnir reconstruì mo parzialmain: il cunfin a Meraun è vegnì fixà enturn l'onn 590 suenter cumbats tr. ils Francs ed ils Langobards, las parts settentriunalas èn vegnidas attribuidas en il 7. tsch. a l'uvestgieu da Constanza. A l'uvestgieu da Cuira appartegnevan en il temp medieval il territori dal chantun Grischun odiern (senza il Puschlav), la Val dal Rain fin al Hirschensprung, la regiun da Sargans, la Planira da la Linth, las parts settentriunalas dal Glaruna, la Val d'Ursera, l'odiern Principadi dal Liechtenstein, il Vorarlberg fin e cun Götzis, il Paznaun ed il Vnuost fin a la Passer.
L'uvestgieu da Cuira para d'esser vegnì fundà gia en il 4. tschientaner. L'emprim uvestg doc. è Asinio (451). Elements da la lingua da baselgia rum. mussan che la Currezia è per gronda part vegnida romanisada e cristianisada tr. il 5. ed il 6. tschientaner. Theoderich ha integrà la Rezia en l'Imperi ostrogotic sco bastiun cunter ils Germans (furmla da nominaziun da ca. 506 per il dux militar dad omaduas provinzas reticas, brevs d'admoniziun dal 507-511 al dux Servatus). Prob. pauc suenter il 536 è la Rezia passada a l'Austrasia francona, la part orientala dal domini dals Merovings (Neustrien era la part al nordvest tr. la Loire e la Schelde). En consequenza da la suveranitad indeblida dals Francs en il 7. ed a l'entsch. dal 8. tsch. ha la Currezia cuntanschì ina posiziun autonoma a l'ur da l'Imperi ch'ha permess a la fam. indigena dals Zaccons/Victorids da surpigliar la pussanza. Quels han eventualmain d'engraziar lur status ad in'allianza matrimoniala cun in francon Zacco (dux militar en il 6. tsch.?).
Il Testament da Tello (765), ina donaziun da l'uvestg a la claustra da Mustér, iniziescha ina seria da funtaunas singularas da grond'impurtanza (perfin sin il champ europeic) per l'istorgia curretica da l'epoca merovingica e carolingica. Quest testament palesescha o.t. la colonisaziun, la situaziun sociala ed ils dretgs da possess en la Val dal Rain da Mustér a Sargans. Analisas linguisticas e diplomaticas, ma era retschertgas archeologicas recentas (trais baselgias claustralas da Mustér dal temp merovingic tardiv ed il chastè da Schiedberg/Sagogn, sedia presumtiva dals Zaccons) cumprovan l'autenticitad dal doc. ch'è prob. ina redacziun amplifitgada da dus texts anteriurs. Ils Zaccons occupavan ils dus uffizis seculars ed ecclesiastics principals, numnadamain quel dal preses e quel da l'uvestg. Cura che Carl il Grond ha integrà pli ferm ils Alemans en l'Imperi francon ed ha conquistà il 773-74 l'Imperi langobard, ha el sutminà pass per pass l'autonomia politica da la Currezia, regiun impurtanta per il traffic da transit: enturn l'onn 773 ha el confermà Constantius sco rectur ed uvestg ed ha affirmà l'urden giuridic curretic, cun resalva da la fidaivladad. Il successur da Constantius, Remedius, era prob. in Franc (correspundenza cun Alkuin, directur da la scola da la Curt imperiala, instituida da Carl il Grond). Suenter la mort da quel l'onn 806 ha Carl il Grond introducì la constituziun da contadi, separà las duas pussanzas (l'ecclesiastica e la seculara) ed ils bains da l'uvestgieu e dal contadi. Al contadi appartegnevan ils bains liads a l'uffizi dal cont ed ils bains che l'Imperi aveva cedì sco benefizis a ses vasals, probablamain o.t. per segirar las vias da transit. Cunter la privaziun arbitrara d'ulteriurs bains episcopals (o.t. baselgias e reliquias), interprendida prob. en ils onns 824-25 tras il cont Roderich, ha l'uv. Victor III inoltrà avant l'onn 831 quatter plants a Ludwig il Pietus; per augmentar l'effect da ses plants ha el era menziunà las perditas da l'onn 806 (ca. 200 baselgias, trais claustras e.a.). La divisio inter episcopatum et comitatum (segund plant da ca. l'onn 825) po sa referir mo a la partiziun dals bains, dentant betg a quella, consecutiva, da la pussanza ecclesiastica e seculara tr. l'uvestg indigen Victor ed il cont francon Hunfrid. Las trais supplicas instantas èn capodovras diplomatics; ils plants davart la pregiudicaziun da la vita religiusa e dals duairs socials da la baselgia eran prob. giustifitgads. Enturn l'onn 831 ha Ludwig restituì intgins paucs bains. En ils onns 830 ed 840-43 è la Currezia vegnida cumpigliada, sco regiun da cunfin, en las grondas cuntraversas per l'egemonia e la repartiziun da l'Imperi carolingic.

En connex cun il Contract da Verdun da l'onn 843 stat l'«Urbari curretic dals bains imperials» che datescha da ca. l'onn 840 e che permetta da concluder che l'administraziun dals bains roials era separada da quella dal contadi en general. Ins po era constatar in'organisaziun roiala dal traffic (p.p. d'origin roman) cun la ruta principala da Maiavilla via Cuira, Lai, il Güglia ed il Set en Bergiaglia e cun quella da Zuoz via Ardez, S-charl e la Val Müstair en il Vnuost. Cun il Contract da Verdun è la Currezia vegnida incorporada l'onn 843 a l'Imperi ostrofrancon. L'uvestgieu da Cuira è vegnì separà da l'archuvestgieu da Milaun e suttamess a quel da Magonza. Quai ha promovì la germanisaziun, iniziada l'onn 806, da la classa dirigenta e dal dretg en la Currezia. Sia fluriziun culturala, garantida o.t. tras l'uvestgieu da Cuira e tras las claustras da Mustér, Müstair e Faveras, ha la Currezia gì en il temp carolingic. Sco center da furmaziun ha Cuira irradià fin a S. Gagl. L'eleganta scrittira retica (p.ex. quella dal «Liber viventium» da Faveras) è vegnida remplazzada enturn l'onn 820 tras la minuscla carolingica, entant che la pergiamina retica è vegnida substituida pir en il 11.-12. tsch. tras quella germana, sigillada, e tras la pergiamina notariala taliana. Da la splendur artistica da la Currezia en il temp medieval tempriv dattan perditga o.t. las baselgias claustralas da Müstair e Mistail e la chaplutta da S. Benedetg a Damal. La «Lescha romana da Cuira» dal 8. tsch. - ina versiun redigida da la «Lex Romana Visigothorum» - preschenta il dretg da disa da la Rezia sin basa dad interpretaziuns falladas e diversas. Enturn il 800 ha l'uv. Remedius decretà leschas ecclesiasticas («Capitula Remedii»). D'ina qualitad litterara remartgabla è p.ex. la «Vita» da s. Gliezi che datescha da la fin dal 8. tschientaner. Per ils onns 850-950 èn las funtaunas pli raras; la Currezia aveva prob. pers sia impurtanza politica ed economica sco regiun da cunfin e da transit ed era vegnida integrada en il nov ducadi da la Svevia, fundà l'onn 917.
En la segunda mesadad dal 10. tsch. è la Currezia puspè daventada ina regiun da transit impurtanta, ed ils uvestgs da Cuira han sustegnì ils imperaturs ottons. Tenor funtaunas posteriuras è la Currezia vegnida separada en il 10. tsch. en trais contadis: en la Rezia Sut (fin a la Landquart), en la Rezia Sura ed en il Vnuost (conts: surtut ils Hunfrids, Guelfs, Bregenzs ed Udalrichs). Quests contadis èn sa schliads en il 12. tschientaner. En il Vnuost èn sa fatgs valair ils conts tirolais a partir dal 1141. En la Rezia Sut e Sura èn naschidas dapi il 12. tsch. numerusas pussanzas ecclesiasticas e secularas, pli tard era corporaziuns communalas. Il svilup dal temp carolingic al temp autmedieval ed al temp medieval tardiv sco era la constituziun da las pussanzas èn fatgs cumplexs e - per mancanza da funtaunas - difficils da reconstruir; il meglier sa laschan eruir quels dals signuradis claustrals. Il svilup dal domini episcopal è enconuschent mo per part, malgrà las donaziuns dals Ottons (Bergiaglia, mesa civitas da Cuira, dretgs d'incassar dazis e taglias, da batter munaida, euv.). Varsaquantas valladas, p.ex. l'Engiadin'Ota, sa laschan identifitgar cun ministeris da l'«Urbari curretic dals bains imperials». En la regiun da Vaz Sura para probabla la cuntinuitad funcziunala (betg genealogica) d'in benefizi carolingic al domini feudal dals baruns de Vaz. Il contadi da Lags, ina communitad eterogena da persunas furmada en il temp medieval tardiv, ha prob. sias ragischs instituziunalas en il temp medieval tempriv. Evidentas èn la cuntinuitad da l'uvestgieu da Cuira dal 4./5. tsch. fin il di dad oz, sia appartegnientscha a l'archidiocesa da Magonza dal 843-1802 sco era la cuntinuitad linguistica dal lat. vulgar al retorumantsch. En l'intschess da l'anteriur contadi da la Rezia Sura èn sa sviluppadas en il 14.-15. tsch. las Trais Lias, da las qualas è resortì en il 19. tsch. il chantun Grischun.
 



Funtaunas:
BUB 1-3.

Litteratura:
HS I/1, 449-619; Von der Spätantike zum frühen Mittelalter, edì da J. Werner, E. Ewig, 1979; H. Maurer, Churrätisches und st. gallisches Mittelalter, 1984; Geschichte und Kultur Churrätiens, edì dad U. Brunold, L. Deplazes, 1986; O.P. Clavadetscher, Zur Führungsschicht im frühmittelalterlichen Rätien, en: Montfort, 42/1990, 63-70; R. Kaiser, Churrätien im frühen Mittelalter, 1998 (2008²); HbBG 2 e 4; S. Grüninger, Grundherrschaft im frühmittelalterlichen Churrätien, 2006; F. Renz, Churrätien zur Zeit des Investiturstreits (1075-1122), 2008.

Lothar Deplazes

lemma precedents CuragliaCurrier lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: