Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Renaschientscha retorumantschaRepublica da las Trais Lias lemma sequent

Renesse, Camille Frédéric de
* 9-7-1836 a Brüssel, † 12-6-1904 a Nizza. Cont beltg.  ∞ Malvina, contessa de Kerkove von Deterghem († 1884). Interprendider ed autur. Il 1880 è R. sa trategnì en cura a S. Murezzan, nua ch'el ha gì l'idea visiunara d'in immens implant d'hotels cun grandhotels, bogns e plazzas da golf per l'aristocrazia europeica. Suenter avair succumbì l'emprim a Schlarigna e Segl ed alura a S. Murezzan a l'influenza da la fam. Badrutt, ha el pudì cumprar a Malögia 140 ha terren al Lai da Segl. Il 1-7-1884 ha el realisà ses siemi cun avrir l'Hôtel Kursaal de la Maloja (Maloja Palace dapi il 1886), in hotel per la noblezza europeica cun 300 stanzas, electricitad, in ascensur ed in bogn da cura (l'hotel il pli grond ed il pli modern en l'Europa da quel temp). En pli ha el laschà eriger l'odiern Schweizerhaus ed ina baselgia catolica. Mo in mez onn pli tard ha l'interpresa dad R. dentant fatg concurs suenter ch'ils cunfins eran vegnids serrads en consequenza d'ina epidemia da colera prorutta en l'Italia. R. è sparì (senza laschar fastizs) da sia sedia residenziala, la tur neogotica Belvedere sur Malögia anc betg terminada. El ha alura vivì cun sia figlia en il Château Beaulieu a Nizza, nua ch'el ha scrit cun success ovras da devoziun (tr.a. «Jesus Christus»). En possess d'ina banca, ha l'hotel Maloja Palace prosperà (suenter la liquidaziun dals debits) fin il 1914, suenter la guerra n'ha el dentant betg pli pudì sa revegnir ed è vegnì serrà il 1936. L'hotel da trais stailas è oz en possess da l'interprendider tal. Amedeo Calvarino. El ha servì en div. romans e films sco lieu d'acziun e culissa, tr.a. en il roman «Alpentragödie» da Richard Voss (1909).


Litteratura:
P. Böckli, Bis zum Tod der Gräfin: das Drama um den Hotelpalast des Grafen de R. in Maloja, 1998 (20099).

Adolf Collenberg

lemma precedents Renaschientscha retorumantschaRepublica da las Trais Lias lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :