Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Paulsteiner, AaronPauperissem lemma sequent

Pauperesser
Noziun che subsumescha la totalitad da las mesiras prendidas per impedir, mitigiar u dismetter paupradad. Il dretg medieval n'enconuscheva nagina assistenza statala e nagina punibilitad per batlegim ed oziusadad vaganta (Vagants). Per la tgira dals paupers uffants da Dieu era responsabla la Baselgia che finanziava quella cun l'agid da dieschmas, almosnas da la misericordia privata, donaziuns ed anniversarias. Tenor ils doc. sa basavan questas contribuziuns main sin l'amur per il proxim che sin il quità dals donaturs per il salit da l'atgna olma. L'emprima chasa da paupers a Cuira è attestada ca. l'onn 900. Durant il temp autmedieval èn stads ils ospizis da grond'impurtanza per ils paupers e viandants. A partir dal 15. tsch. ha surpiglià adina dapli l'avugà da spenda secular - era en l'interess dal guvern ecclesiastic statal - ina rolla activa en il pauperesser, q.v.d. l'administraziun da las spendas e da la facultad da collectas da baselgia. Ils Artitgels da Glion dals onns 1524 e 1526 han delegà l'assistenza als paupers a las vischnancas. Ils vischins n'avevan però nagin dretg legal ad in tal sustegn. Ils fulasters e domiciliads basegnus, ils murdieus ed ils vagants pudevan vegnir bandischads (Dretg da burgais). Intgins vischinadis disponivan da fonds da spendas e possedevan ina chasa da paupers gia avant il 18. tsch. (p.ex. Cuira e Trun; Organisaziuns d'agid social). Il pauperesser era dentant en general en in nausch stadi. La Dieta da las Lias rendeva attent regularmain ils vischinadis e cumins a lur duairs. Lur suveranitad sacrosancta impediva però tut las tentativas da mitigiar il problem tras obligaziuns legalas e mesiras coordinadas - cun excepziun da chatschas occasiunalas da murdieus esters. Il pensar general era anc adina dominà da l'idea da la charitad pietusa ecclesiastica e privata. Ins na tegneva betg bler d'ina politica sociala statala u d'in scumond da batlegiar.
La politica sociala moderna, naschida sin basa dal dretg natiral d'existenza e da l'obligaziun d'assistenza statala respectiva, è sa fatga valair plaun a plaun pir en il decurs dal 19. tschientaner. Las leschas dal 1803 scumandavan il batlegiar, regurdond las vischnancas a lur duairs. Il 1808 han ins puspè reactivà la veglia dretgira criminala chant. per esters e vagabunds, q.v.d. remess l'urden vegl, limità o.t. a la repressiun dal vagabundissem. Il messadi dals emprims piuniers socials - Heinrich Ludwig Lehmann, Christian Hartmann Marin, P. Placi a Spescha e Carl Ulysses von Salis-Marschlins - ha gì l'emprim pauc effect. Il Chantun n'aveva ni ils daners ni las cumpetenzas per sustegnair ils paupers, p.ex. cun procurar per lavur. Bleras vischnancas na vegnivan betg a frida ni dal punct da vista uman ni material cun il pauperesser, ma eran fixadas sin lur suveranitad. Nauschas racoltas, epidemias e catastrofas provocavan adina puspè miserias e manavan rotschas da murdieus esters en il Grischun. Il 1839 ha il Grischun statuì l'emprim urden chant. davart l'assistenza als paupers che scumandava il batlegim sin isch-chasa e sin via ordaifer l'atgna vischnanca e che intimava las vischnancas d'avrir fonds per ils paupers. Ina cumissiun pauperila u avugads da spenda avevan d'administrar quests fonds. Pli tard han surpiglià ils avugads da paupers l'assistenza als manglus e dependents. Lur lavur vegniva survegliada dad 11 cumissaris distr. sut la direcziun da la cumissiun pauperila chant. che consistiva dal 1839-45 da trais comm. da la cumissiun d'educaziun, da la quala ella è alura vegnida separada fin a sia aboliziun il 1857. Sut sia direcziun han ins realisà il 1840 la Chasa chant. da paupers e da correcziun, integrada en il chastè episcopal a Farschno, a partir dal 1855 a Riòlta. Johann Rudolf Brosi, da quel temp pres. da la cumissiun pauperila, ha renconuschì il 1842 l'assistenza a pliras vischnancas, crititgond però a medem temp la passivitad e l'indifferenza da bleras autras. Dal problem dal pauperesser èn s'occupads, ultra dals clericals socialmain engaschads - p.ex. Teodosius Florentini - era giuvens liberals-radicals, tr.a. il politicher fed. prominent Johann Bartholome Caflisch en ses «Beitrag zur Kenntnis Bündnerischer Zustände» (1849). Caflisch resguardava la paupradad en il Grischun sco main gronda ch'en ils centers industrials. La cultivaziun da tartuffels e la diversitad da la producziun agricula avevan mitigià ils effects da las nauschas racoltas. Il pauperesser era però creschì a partir da l'entsch. dal 19. tschientaner. Las raschuns principalas da la pauperisaziun creschenta eran, tenor Caflisch, il sistem da taglia parzial, l'administraziun manglusa da la giustia e las nauschas administraziuns communalas. L'emigraziun derasada privava ultra da quai l'agricultura da las forzas da lavur e dals meds finanzials necessaris. Consequenzas particularmain negativas ha gì dentant o.t. la perdita d'entradas da la Vuclina (1797) e da las capitulaziuns militaras sco era la mancanza da pussaivladads da chattar novas resursas a l'intern dal Chantun. Caflisch ha però crititgà era la scolaziun manglusa dals uffants. Il stadi dueva, a ses avis, s'occupar dals paupers cun porscher ina meglra scolaziun, stgaffir plazzas da lavur e promover l'educaziun tras la lavur, en collavuraziun cun las vischnancas e cun privats. Sias propostas èn vegnidas integradas en l'urden davart l'assistenza dals paupers dal 1857 che reflectava era il spiert da Florentini. Ils cussegls e las dretgiras cirq. avevan remplazzà ils cumissaris distr. sco autoritad da surveglianza, e l'entir pauperesser era vegnì suttamess a la Regenza. Il princip dals vischins era vegnì mantegni, q.v.d. che las vischnancas avevan da s'occupar mo da lur agens vischins. Il princip da domicil è vegnì introducì pir suenter il 1874.
Enturn il 1850 han privats e plaivs planisà e per part era realisà numerus projects d'industria chasana en favur dals paupers (tessaria da strom, filandaria e.a.), la mentalitad da la glieud ha dentant impedì il success dals projects. Il milieu puril considerava la lavur industriala fin lunsch viaden il 20. tsch. sco ingiuria, essend oriundamain ina lavur sfurzada, ordinada da las autoritads pauperilas. Blers èn perquai emigrads suenter il scumond general da batlegiar dal 1857. Da quel temp èn s'occupadas numerusas publicaziuns dal pauperesser. Il «Bündner Monatsblatt» per exempel, cumparì dal 1850-97 sut il titel «Zeitschrift für Erziehungs-, Armenwesen und Volkswirtschaft», ha disponì fin il 1857 d'ina rubrica regulara davart il pauperesser cun statisticas, projects e rapports davart las activitads da las numerusas societads d'agid privatas e da lur instituziuns: p.ex. il Foral a Cuira (1836), la Chasa da succurs ad Aschera (1837), la Chasa d'orfens a Cuira (1844), il Plankis a Cuira (1845) ed il Löwenberg a Schluein (1852). Suenter il 1860 èn s'occupads surtut ils clericals enturn Florentini ed il preditgant Luzi Michel sco era ils Liberals da sanestra da la dumonda sociala. Sin plaun naz. e perfin europeic è sa profilà il politicher social cat. Caspar Decurtins che fascheva - sco Michel - ina politica sociala senza resguard da confessiuns e partidas ("La fom n'è ni catolica ni protestanta"). La lescha d'assistenza dal 1920 preveseva in'avugadia uffiziala e l'assegnaziun en chasas da correcziun per alcoholics, schlaschads e vagants. Dal 1924-78 ha existì il "Vagantenkredit" chant. ch' è stà la basa materiala per l'acziun penibla da la Pro Juventute, interprendida en ils onns 1926-72 sut il titel "Affons da la via". Il svilup economic suenter il 1945, l'activitad da fundaziuns da solidaritad naz. e comm. e las ovras modernas d'assicuranza sociala instituidas dal stadi han conferì al pauperesser ina basa cumplettamain nova ed eliminà la furma tradiziunala da la paupradad. La societad da bainstanza e surabundanza ha provocà l'uschen. nova paupradad, il cumbat da la quala è per il stadi social ina nova sfida (Pauperissem). La quota da retschaviders d'agid social è crudada en il Grischun tr. il 2005 ed il 2010 dad 1,5 sin 1,2% da la populaziun (Svizra ca. 3%).


Litteratura:
J.R. Brosi, Kurzer Bericht über das Armenwesen im Kanton Graubünden, 1842; J.B. Caflisch, Beitrag zur Kenntnis Bündnerischer Zustände, mit besonderer Rücksicht auf Auswanderung, 1849; B. Hartmann, Hundert Jahre bündnerische Armenpolitik, en: BM, 1917, 265-83; E. Mirer, Das Armenwesen des Kantons Graubünden, 1922; HBLS 3, 698; B. Mathieu, Zur Geschichte der Armenpflege in Graubünden im Mittelalter und zu Beginn der Reformationszeit, 1928; G. Dazzi e.a., Puur und Kessler, 2008, 102-42.

Adolf Collenberg

lemma precedents Paulsteiner, AaronPauperissem lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: