Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Peer, OscarPeisel lemma sequent

Peiden
Anteriura vischnanca polit., cirq. Lumnezia, distr. Surselva (avant il 2001 Glogn), fusiunada il 1963 cun Uors a la vischnanca polit. dad Uors-P., fracz. da la vischnanca polit. da Suraua dapi il 2002. Abitadi situà sin la spunda a la via da colliaziun tr. la Lumnezia Sura e Sut. 1345 Pedens. 1850 91 abit.; 1900 129; 1910 147; 1950 87; 1960 67; Uors-P.: 1970 116 abit.; 1980 69; 2000 90. En il temp medieval tardiv suttasteva la culegna rum. dal 11. tsch., sco feud episcopal, a la suveranitad territoriala dals Belmonts, suandads il 1371 dals Lumerins ed il 1390 dals Sax-Mesauc. Il 1538 è la vischnanca da P. sa cumprada ora dals dretgs feudals. Fin il 1851 ha furmà P. cun Camuns e Cumbel in vischinadi. Ecclesiasticamain appartegneva la vischnanca a la baselgia da S. Vintschegn a Pleif/Vella, il 1745 è ella daventada ina curazia consecrada a la s.Trinitad e dal 1910-63 ha ella furmà ina plaiv. P. è vegnì pastorà da chaputschins dal 1873 fin il 1924. En il fund da la val, da la vart sanestra dal Glogn, sa chattan la chaplutta menz. il 1345 (consecrada oriundamain a s. Sigismund, alura a s. Gliezi) ed il bogn da P., enconuschent dapi il 13. tschientaner. Sias trais funtaunas eran, tenor in doc. dal 1563, en possess da P. e da Camuns. Il 1812 ha ina bova, il 1868 l'aua gronda destruì las funtaunas, da quel temp en possess dal medi e cuss. naz. Gion Barclamiu Arpagaus da Cumbel. Il bogn, reactivà il 1873, aveva in bun num en ils circuls socials pli elevads da la Belle Epoque. Il 1891 han ins erigì ina nova chasa da cura ed il 1906 in edifizi annex. L'Emprima Guerra mundiala ha mess ina fin al manaschi da cura, avert da mez zercladur fin la fin settember. Dapi alura dispona P. mo pli d'ina ustaria. Il vitg è periclità (sco Scuders) da bovas. Ils donns vegnan surpigliads tr.a. da la Fundaziun Pro Peiden-Scuders. P. è in abitadi en privel d'extincziun.


Litteratura:
M. von Rascher, Die Mineralquellen und Curanstalt zu P. im bündnerischen Alpenthale Lugnez, 1862; Kdm GR 4, 209–11; Gem. GR, nr 195, 1984; D. Blumenthal e.a., Kulturführer Val Lumnezia und Vals, 2000, 201-09.

Adolf Collenberg

lemma precedents Peer, OscarPeisel lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: