Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents SpleiaSpliatsch lemma sequent

Spleia, Pass dal
Passadi a 2113 m che maina da Valragn (Val dal Rain Posteriur) en la Val S. Giachen en l'Italia, tal. Passo dello Spluga, tud. Splügenpass. Il pass ha survegnì ses num da la vischnanca da S., situada al punct da partenza da la vart nord (831 cella in speluca). En il temp medieval vegniva il S. era numnà Colmen d'Orso ed Urschler.
Il chat d'ina barra da fier en vischinanza dal pass cumprova ch'il S. vegniva frequentà gia en temps preistorics. Duas chartas da vias rom. documenteschan il diever dal S.: l'«Itinerarium provinciarum Antonini Augusti» (ca. 300 s.C.) menziunescha a la ruta dal S. tr. Cuira e Clavenna la staziun da Tarvesede, situada prob. en la Val S. Giachen. En la «Tabula Peutingeriana» (3. tsch. s.C.) èn attestadas las staziuns da Lapidaria en il Schons, Cunuareu (evtl. sin il S.) e Tarvessedo. Cuntrari als pass dal Güglia e dal Set na para il S. betg d'esser stà charrabel en il temp roman. Entant ch'il tschancun da la vischnanca da S. al pass è topograficamain pauc pretensius, è la descensiun suenter la planira dal Munt S. (tal. Monte Spluga) ordvart stippa e difficila. Fin viaden il 19. tsch. existivan là adina duas vias div.: la via da sauma «di sotto» manava lung il Liro tras la charvogia dal Cardinel ad Isola, quella «di sopra» sur il culm d'Andossi via Madesimo u Pianazzo a Campodolcino, nua che las rutas s'univan puspè.
La colonisaziun permanenta da la part sura da la Val S. Giachen (13. tsch.) ha era rinforzà ils contacts regiunals sur il pass ch'avevan gia adina existì tr. l'uvestgieu da Cuira e Com. In punct central dal contract da pasch dal 1219, stipulà tr. il Schons (cun il Valragn Dadora) e Clavenna, era la segirezza dal traffic sin la ruta dal S. Tut las persunas da Clavenna e dals lieus limitrofs duevan pudair traversar libramain e segiramain cun lur martganzia l'entira Val Schons da la Viamala usque ad Spelugam (fin a S. resp. fin sin il pass). Quai valeva era per las alps da Clavenna, fittadas al nord da las Alps. Il S. è probablamain vegnì concurrenzà temporarmain dal Pass da Niemet (2295 m) che maina da Calantgil a Madesimo. Il 1226 ha Clavenna vulì laschar construir ina via per chars d'in ischigl da Campodolcino a Madesimo. Da là davent avev'ins access tant al S. sco a l'Alp Niemet, fittada da Clavenna dapi il 1204.
Il pass grischun il pli impurtant en il temp medieval era il Set a la Via Sura, promovì da l'uvestg da Cuira. Ils conts da Werdenberg-Sargans avevan tschertgà en il temp medieval tardiv da sviar il traffic da transit lucrativ sin la Via Sut sur il S. u sur il S. Bernardin. L'imp. Carl IV ha però preferì il Pass dal Set ch'ha obtegnì suenter il 1387 ina via charrabla. Tuttina èn attestadas il 1396 entradas considerablas per la duana al S. Da grondischma impurtanza per la prosperitad dal S. è stada la construcziun da la via tras la Viamala ch'era l'impediment principal da la vart settentriunala da las Alps. A quella han participà tant ils abitants da Spleia sco era era vischins dal Valragn e da la Val S. Giachen. Il traffic da martganzia vegniva tgirà dals ports, menz. gia en la brev da la Viamala dal 1473. I sa tractava da corporaziuns localas da purs da sauma (berniers) che transportavan la martganzia d'ina susta a l'autra. A S. surpigliavan ils berniers dal Valragn Dadora la martganzia dals da Schons e transportavan quella fin a l'ospizi al Munt S. Là spetgavan ils purs da la Val S. Giachen per manar la rauba a Clavenna. Quest monopol da transport dals abitants residents aveva per consequenza che la martganzia vegniva transtgargiada tschintg giadas da Cuira fin a Clavenna e viceversa. Mo la rauba d'express dastgava vegnir transportada sin via directa (uschen. Strackfuhr).
La situaziun strategica da la Val S. Giachen al pe meridiunal dal S. declera sia dependenza da las Trais Lias. Ella aveva dentant div. privilegis entaifer las Terras subditas dal Grischun (1512-1797): il port da la Val S. Giachen p.ex. aveva ils medems dretgs sco quellas al nord da las Alps. Il traffic da transit era impurtant per l'economia regiunala. A S. p.ex. vivevan il 1809 quaranta berniers che pratitgavan a medem temp l'agricultura ed il transport da martganzia (en roda); set berniers d'express eran occupads mo cun il transport da martganzia, dal qual els eran dependents. Fin a l'entsch. dal 19. tsch. vegnivan utilisads per regla chavals da sauma per il transport da rauba sur il S. Chars a dus ischigls paran d'esser stads grondas excepziuns. Il 1798 scriva Heinrich Joseph Johannes Graf von Bellegarde che la via saja "cuvernada da crappa gitta e d'ina nauscha salaschada" e che "la gronda part da martganzia da la regiun da Milaun fin en Germania vegn[i]a transportada sur quest pass, il pli savens cun chavals e mils."
L'ospizi sa chattava a 1901 m a l'ur da la planira auta dal Munt S. La via tras la chavorgia privlusa dal Cardinel è vegnida sanada per gronda part enturn il 1643 e suenter il 1709 ed è alura vegnida tagliada parzialmain en il grip. Era ils tschancuns sur Madesimo e Pianazzo èn vegnids renovads. Il marschal franz. Alexandre Mac Donald duai avair pers il dec. 1800 plirs tschients umens cun traversar il S. Dapi la separaziun da la Vuclina da las Trais Lias (1797) furma il S. era il cunfin naziunal.
En ils onns 1818-23 han ins construì, ultra da la via dal S. Bernardin, l'emprima via per chars da martganzia e charrotschas sin l'entir traject dal S. Suenter il Simplon ed anc avant il Gottard è la Via Sut daventada uschia la segunda via d'art sur las Alps. Il traject da Cuira sur il S. Bernardin a Blinzuna è vegnì finanzià dal chantun Grischun, per gronda part dentant dal reginavel da la Sardegna-Piemunt. Per il reginavel lumbard-venez. era il traffic sur il S. periclità, quai ch'ha motivà el da laschar construir da sia vart, ad agen quint, ina via sur ils cunfins svizzers fin a S. Questa via correspunda per gronda part a la ruta anc oz utilisada. Al nord dal S. na manava la via, confurm als plans da l'inschigner Carlo Donegani, betg pli tras las lavineras da l'Altberg. Al sid han ins tschernì ina lingia pli u main nova che manava sut il Munt S. fin a Campodolcino e che guntgiva la chavorgia dal Cardinel. Surtut da la vart sid dal pass èn vegnids construids numerusas galarias e refugis. Suenter las auas grondas desastrusas dal 1834, è la via vegnida parzialmain transferida. Il 1841 han ins erigì da la vart nord, a 2022 m, l'emprima chasa cun ina staziun da duana.
Suenter l'avertura da la via dal S., è creschì il traffic da martganzia en pauc temp considerablamain. En ils decennis sequents è stà il S. in dals pass alpins cun las pli autas frequenzas. Sper il transport da martganzia è sa stabilì plaun a plaun in traffic turistic. Ils berniers, ustiers, mastergnants e purs profitavan dal transit. Ils berniers vegnivan ussa emploiads e pajads da spediturs e d'interpresas da transport, surtut da Cuira e da Clavenna, ch'han remplazzà, cunter l'opposiziun da las vals da transit, ils ports dals purs da sauma. Il traffic da transit sur il S. ha cuntanschì sia culminaziun en ils onns 1850. L'avertura da las viafiers dal Brenner (1867) e dal Mont Cenis (1872) ha diminuì il traffic sur il S. L'avertura da la Viafier dal Gottard (1882) ha provocà in'interrupziun quasi cumpletta dal traffic da transit tras il Grischun. Ils projects per la realisaziun d'ina Viafier dal S. n'han gì nagin success. Dapi la Segunda Guerra mundiala è la via sur il S. serrada durant l'enviern.


Litteratura:
G. Mützenberg, Splügenpass: L'histoire contre la géographie, en: Revue de géographie alpine 61, 1973, 268-284; J. Simonett, Verkehrserneuerung und Verkehrsverlagerung in Graubünden, 1986; Planta, Verkehrswege 4, 35–152; K. Wanner, Via Spluga, 2001 (20114).

Jürg Simonett

lemma precedents SpleiaSpliatsch lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: