Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents MundaunMünster, Sebastian lemma sequent

Mundaun, Piz
Muntogna da 2064 m autezza al sidvest da Glion, numnada era il Rigi grischun pervia da sia bella vista. Menz. en il Testament da Tello dal 765 sco Mendane cum secivo suo, q.v.d. cun in'alp situada al nordvest dal Piz M. sin territori da Surcuolm, utilisada da quel temp sco pastgira. Il M. è daventà enconuschent cun las festivitads dal 1860 en commemoraziun da la Battaglia da Porclas, decidida il 1352 al pe da la muntogna, e tras ils maletgs da Gottfried Ludwig Theobald («Naturbilder aus den Rätischen Alpen», 1860). El è era vegnì dechantà pli tard dals poets rumantschs. Michel Caderas, pictur da Glion, ha realisà il 1861 l'emprim panorama stampà dal M. Il 1867 ha la cumpagnia da mats da Breil represchentà il drama «Guglielm Tell» (versiun rum. da Gion Antoni Bühler) al pe dal M. sper il nov Hotel Péz M., avert il 1862. L'odiern Hotel Bündner Rigi Péz M. datescha dal 1902. Il Piz M. è accessibel al turissem cun ina sutgera da la vart nord.


Litteratura:
C. Caduff-Vonmoos, Il Péz M. e siu hotel, en: Cal. p. mintga gi, 1992, 33-41; A. Darms, Der Piz M., die Wiege des Tourismus in der Surselva?, en: 25 Jahre Bergbahnen Piz M. AG Surcuolm, 1994, 7-17.

Martin Bundi

lemma precedents MundaunMünster, Sebastian lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :