Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Montfort, Rudolf von (Feldkirch)Monthonia [Monthanier], Hans lemma sequent

Montfort, von
Schlatta da conts dal Vorarlberg dal 13.-18. tsch., il possess central dals quals s'extendeva dal nord dal Lai da Constanza sur Briganza e Feldkirch fin en la regiun da Sargans. L'emprim represchentant dals M. è stà Hugo (menz. il 1188, † avant il 1228), il figl da Hugo von Tübingen  († 1182) e dad Elisabeth von Bregenz. El ha surpiglià a chaschun d'ina partiziun effectuada il 1200 tr. el e ses frar Rudolf von Tübingen ina gronda part da l'anteriur possess dals conts da Briganza ed ha fundà uschia il rom dals conts von M. Il 1208 è el documentà per l'emprima giada sco tal. A partir dal 13. tsch. è el sa stentà, sco pli tard ses figl Hugo (menz. il 1237-59), d'affirmar ses signuradi. Da quai dattan perditga tr.a. la fundaziun resp. l'amplificaziun da las citads residenzialas da Feldkirch (enturn il 1190) e da Briganza (vers la fin dal 12. tsch.). Partiziuns ereditaras ed il squitsch creschent dals Habsburgs en il davos quart dal 13. tsch. han però impedì la realisaziun d'ina atgna suveranitad territoriala cumplessiva.
Prob. en consequenza da la dispita naschida en ils onns 1240 tr. Hugo e sia quinada Clementa von Kyburg, la vaiva da Rudolf († 1243), è sa separà il rom dals conts de Werdenberg da la famiglia M. enturn il 1258. El ha surpiglià ils bains e dretgs en la regiun da Sargans, en l'odiern Principadi dal Liechtenstein ed al sid dal Vorarlberg, entant che quels al nord da Feldkirch èn restads en possess da Hugo. Tras in'ulteriura partiziun han fundà il 1272 ils figls da Hugo, Rudolf, Ulrich e Hugo, ils roms da M.-Feldkirch, M.-Bregenz e M.-Tettnang. Carrieras spiritualas han fatg sco uvestgs da Cuira Friedrich, Heinrich e Rudolf. La lingia da M.-Feldkirch ha tgirà stretgas relaziuns cun l'uvestgieu da Cuira fin a sia extincziun il 1390. Sco davos exponent da la schlatta ha vendì Rudolf il 1375, avant sia mort, l'entir possess da la fam. als ducas d'Austria. En il 15. tsch. èsi reussì a la fam. M.-Tettnang da fitgar puspè pe, almain temporarmain, en la Svizra Orientala. Uschia ha ella acquistà il 1402 il signuradi da Werdenberg ed è stada per in curt temp era en possess dal signuradi da Kyburg (pegn austr.). Sco cunertavla dal davos cont de Toggenburg, ha ella survegnì il 1437 tut ils possess retics (las Sis Dretgiras da la LDD), cun excepziun da Maiavilla. Ma gia 50 onns pli tard èn puspè vegnids vendids tut ils novs acquists.


Litteratura:
GHS 1, 140-234, 409, 414 s.; 3, 406 (cun tav. geneal.); Die Wappenrolle von Zürich, edì da W. Merz, F. Hegi, 1930, 21 s.; B. Bilgeri, Geschichte Vorarlbergs 1 e 2, 1971-74; R. Sablonier, Adel im Wandel, 1979; Clavadetscher/Meyer, Burgenbuch, 56, 64, 179, 290, 305; K.H. Burmeister, Die Grafen von M.-Tettnang als Schlossherren von Werdenberg, en: Werdenberger Jahrbuch, 4/1991, 15-30; K.H. Burmeister, Die Grafen von M., 1996 (cun bibliogr.).

Martin Leonhard

lemma precedents Montfort, Rudolf von (Feldkirch)Monthonia [Monthanier], Hans lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: