Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents LötscherLöwenstein, von lemma sequent

Löwenberg
Il signuradi da L., schlià il 1803, ha fatg part sco cumin da Schluein da la dretgira auta da la Foppa. El è sortì dal feud episcopal da Schluein senza il bain (curtis) da Fallerins ed aveva sia sedia en il chastè dal medem num, situà sin in sparun. La fortezza è menz. per l'emprima giada il 1160 sco residenza dals nobels de Lewenberc che appartegnevan a la medema schlatta sco ils de Montalt, doc. il 1258 sco proprietaris dal chastè; forsa sa tracti perfin da la medema famiglia. Il 1378 è il chastè passà als Rüsseggs ed ha appartegnì dal 1383-1428 als Werdenberg-Sargans. Il 1395 han quels aderì a la Lia dals signurs a Glion (la Lia Sura resp. Lia Grischa) - ens. cun la glieud dal signuradi da L. ch'han acquistà lur autonomia il 1428. Il 1429 è il chastè vegnì vendì als Lumerins, tr. il 1481 ed il 1489 als de Mont (Vella) per midar pliras giadas possessur tr. il 1551 ed il 1594 (tr.a. ils Capols ed ils Plantas); fin il 1803 ha il chastè appartegnì al rom dals de Mont-L. Destruì d'in incendi il 1685, è el vegnì reconstruì parzialmain. Sedia d'ina scola per mats 1832-33 e dals missiunaris dal Sang prezius 1838-50. In ulteriur incendi ha mess l'implant en ruina il 1889; l'asil episcopal per orfens, existent là dapi il 1851 (serrà il 1972), è perquai vegnì transferì ca. 150 m pli al sidvest en in nov edifizi ch'è en possess da la diocesa da Cuira.


Litteratura:
J. Simonett, Eine Knabenschule in L. 1832, en: BM, 1934, 305-17; Clavadetscher/Meyer, Burgenbuch, 92 s.; D. Kobler, L. - vom Schloss zum Durchgangsheim, en: TG, 1997, nr 5, 39-42.

Adolf Collenberg

lemma precedents LötscherLöwenstein, von lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :